ខេត្តក្រចេះ បន្តចាប់ដៃជាមួយវៀតណាម វិនិយោគនៅតំបន់សេដ្ឋកិច្ច

2018-09-20 04:29:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វ៉ា ថន អភិបាលខេត្តក្រចេះ និងលោក វ៉ូ គៀនមិញ ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋសង្គមនិយមវៀតណាម បានពិភាក្សាពីបំណងបន្តកិច្ចសហប្រតិបត្តិការ វិនិយោគក្នុងតំបន់សេដ្ឋកិច្ច ដើម្បីបង្កើនសេដ្ឋកិច្ចសម្រាប់ប្រជាពលរដ្ឋក្នុងខេត្តក្រចេះ។ នេះបើតាមការចុះផ្សាយរបស់វេបសាយក្រសួងមហាផ្ទៃ។

ជំនួបរវាងលោក វ៉ា ថន អភិបាលខេត្តក្រចេះ និងលោក វ៉ូ គៀនមិញ ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋសង្គមនិយមវៀតណាម កាលពីថ្ងៃទី១៩ ខែកញ្ញា ឆ្នាំ២០១៨ (រូបថត៖ វេបសាយក្រសួងមហាផ្ទៃ)

ក្នុងឱកាសជួបសំណេះសំណាលកាលពីថ្ងៃទី១៩កញ្ញា លោក វ៉ា ថន បានបញ្ជាក់ថា ទឹកដីខេត្តក្រចេះ មានលក្ខណៈអំណោយផលដល់ការវិនិយោគសេដ្ឋកិច្ច ដោយផ្អែកលើកិច្ចសហប្រតិបត្តិការរវាងក្រុមហ៊ុនដៃគូ វិនិយោគនានា ក្នុងនោះមានក្រុមហ៊ុនវិនិយោគដីសម្បទានសេដ្ឋកិច្ចចំនួន ៤៩ ក្រុមហ៊ុន វិនិយោគលើផ្ទៃដីសរុបជិត ២០ម៉ឺនហិកតា (១៩៩៩១៦) ដាំដុះកៅស៊ូបានចំនួន ៨៥០០០ ហិកតា និងដំឡូងមីបាន ៤៥២២ ហិកតា ។

លោកបន្តថា កិច្ចសហប្រតិបត្តិការរបស់ក្រុមហ៊ុនវៀតណាម បានវិនិយោគលើដំណាំកសិកម្ម ឧស្សាហកម្ម ចំនួន ១៧ ក្រុមហ៊ុន លើផ្ទៃដីសរុបជាង ៦ម៉ឺនហិកតា (៦៥២១៣) ដោយបានធ្វើការដាំដុះសម្រេចបានជាង ៣ម៉ឺនហិកតា (៣៦៤៧៤) ដែលក្នុងនោះខេត្តក្រចេះ ក៏មានក្រុមហ៊ុនសហគ្រាស និងអាជីវករធនធានរ៉ែ ទទួលអាជ្ញាបណ្ណពីក្រសួងរ៉ែ និងថាមពល សរុបចំនួន ៣៤ក្រុមហ៊ុន ស្មើនឹង ៣៨ អាជ្ញាបណ្ណ។ ក្រុមហ៊ុនវៀតណាមដែលវិនិយោគលើវិស័យរ៉ែមាស មានចំនួន ៤ ក្រុមហ៊ុន គឺក្រុមហ៊ុនស្រាវជ្រាវរ៉ែមាស ១ក្រុមហ៊ុន និងក្រុមហ៊ុនថ្មអារ ៣ក្រុមហ៊ុន៕

អត្ថបទ៖ លាភ.