អាមេរិក គ្រោងរឹតបន្ដឹងការនាំចេញបច្ចេកវិទ្យានុយក្លេអ៊ែរទៅកាន់ចិន

2018-10-12 03:00:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងថាមពលអាមេរិក កាលពីថ្ងៃទី១១ ខែតុលា ឆ្នាំ២០១៨ ម្សិលមិញ បានប្រកាសថា ក្រសួងនឹងធ្វើការរឹតបន្ដឹងការបញ្ជូនបច្ចេកវិទ្យានុយក្លេអ៊ែរទៅកាន់ប្រទេសចិន ដែលជាទីផ្សារមួយសម្រាប់រោងចក្រថាមពល ខណៈសេដ្ឋកិច្ចអាស៊ីកំពុងមានតម្រូវការអគ្គិសនី តាមរយៈប្រភពកាបូនទាប។

រូបភាព៖ Reuters

លោក Rick Perry រដ្ឋមន្រ្តីក្រសួងថាមពលអាមេរិកបានបញ្ជាក់ក្នុងសេចក្តីប្រកាសព័ត៌មានថា "អាមេរិកមិនអាចបំភ្លេចការជាប់ពាក់ព័ន្ធសន្ដិសុខជាតិ ជាមួយកិច្ចខិតខំរបស់ចិន ដើម្បីស្រូបយកបច្ចេកវិទ្យានុយក្លេអ៊ែរពីខាងក្រៅ នៃដំណើរការដែលបានបង្កើត នៃកិច្ចសហប្រតិបត្តិការនុយក្លេអ៊ែរស៊ីវិល អាមេរិក-ចិន នោះទេ"។

ក្រសួងថាមពលអាមេរិកបានប្រកាសថា ក្រសួងមិនបានបញ្ឈប់ការនាំចេញនុយក្លេអ៊ែរទៅកាន់ប្រទេសចិននោះទេ ប៉ុន្ដែក្រសួងនឹងធ្វើការពិនិត្យកាន់តែតឹងរ៉ឹងជាងមុន ហើយនឹងមានការបដិសេធសម្រាប់ការផ្ដល់លិខិតអនុញ្ញាតថ្មី ពាក់ព័ន្ធនឹងក្រុមហ៊ុនរដ្ឋចិន General Nuclear Power Corp។

ក្រុមហ៊ុនរដ្ឋចិននេះ និងជនជាតិអាមេរិកម្នាក់ ត្រូវបានចោទប្រកាន់កាលពីឆ្នាំមុនថា បានឃុបឃិតគ្នា អភិវឌ្ឍសារធាតុនុយក្លេអ៊ែរគ្រោះថ្នាក់ ដែលគ្មានអនុញ្ញាតដំណើរការពីអាជ្ញាធរអាមេរិក។

សូមបញ្ជាក់ថា ការរឹតបន្ដឹងការនាំចេញបច្ចេកវិទ្យានុយក្លេអ៊ែរនេះ គឺខណៈពេលអាមេរិក និងចិន កំពុងប្រឈមមុខដាក់គ្នាក្នុងសង្រ្គាមពាណិជ្ជកម្ម ភូមិសាស្រ្តនយោបាយ និងក៏មានការចាប់ខ្លួនចារកម្មចិនជាបន្តបន្ទាប់នៅអាមេរិកផងដែរ៕

ប្រភព៖ Channelnewsasia ប្រែសម្រួល៖ វាសនា