សហព័ន្ធកីឡាបាល់ទាត់វៀតណាម រងការពិន័យជាង ១ម៉ឺនដុល្លារ ពី AFC

2018-10-12 07:15:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហព័ន្ធកីឡាបាល់ទាត់វៀតណាម (VFF) ត្រូវបានសហព័ន្ធកីឡាបាល់ទាត់ទ្វីបអាស៊ី (AFC) ពិន័យទឹកប្រាក់ ១២៥០០ដុល្លារ បន្ទាប់ពីមានករណីអ្នកគាំទ្រក្រុមវៀតណាម ដុតភ្លើងនៅក្នុងការប្រកួតមួយនៃព្រឹត្តិការណ៍កីឡាអាស៊ី (Asian Games) នៅឥណ្ឌូណេស៊ី។ នេះបើតាមការចុះផ្សាយរបស់ Vietnam News នៅថ្ងៃទី១២តុលានេះ។

ហេតុការណ៍នេះ គឺកើតឡើងនៅពេលដែលក្រុមវៀតណាម ប្រកួតចាញ់ក្រុមកូរ៉េខាងត្បូងដោយលទ្ធផល ១-៣ ក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Asian Games។ ការប្រកួតនេះ ធ្វើឡើងកាលពីថ្ងៃទី២៩ ខែសីហា ឆ្នាំ២០១៨ នៅកីឡដ្ឋាន Cibinong។

AFC បញ្ជាក់ថា វៀតណាម បានបំពានវិន័យក្រមសីលធម៌របស់ខ្លួន និងបរាជ័យក្នុងការធានានូវសុវត្ថិភាព និងសន្តិសុខ ក្នុងអំឡុងការប្រកួត។ AFC បានព្រមានពិន័យធ្ងន់ធ្ងរបន្ថែមទៀត ប្រសិនបើអ្នកគាំទ្រវៀតណាម នៅតែបន្តដុតភ្លើងក្នុងអំឡុងមានការប្រកួតជាលក្ខណៈអន្តរជាតិបែបនេះ។

គួររំលឹកដែរថា កាលពីឆ្នាំ២០១៧ សហព័ន្ធកីឡាបាល់ទាត់វៀតណាម ក៏ត្រូវបាន AFC ពិន័យ ១៥០០០ដុល្លារផងដែរ ក្រោយមានករណីអ្នកគាំទ្ររបស់ក្រុមជម្រើសជាតិវៀតណាម បានដុតកាំជ្រួចចំនួនពីរលើក ដែលមានរយៈពេលប្រហែល ៤នាទី ក្នុងអំឡុងការប្រកួតរវាងកម្ពុជា និងវៀតណាម ក្នុងវគ្គចែកពូល AFC Asian Cup 2019។ ការប្រកួតនេះ ធ្វើឡើងកាលពីថ្ងៃទី៥ ខែកញ្ញា ២០១៨ នៅពហុកីឡដ្ឋានជាតិ៕