ក្រសួងអប់រំ មានយុទ្ធសាស្ត្រកំណែទម្រង់ការអភិវឌ្ឍវិស័យកីឡាចំនួន ៥ចំណុច

2018-10-16 06:17:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស សុខា រដ្ឋលេខាធិការក្រសួងអប់រំ យុវជន និងកីឡា បានបញ្ជាក់ថា ក្រសួងអប់រំ យុវជន និងកីឡា មានយុទ្ធសាស្ត្រកំណែទម្រង់ការអភិវឌ្ឍវិស័យអប់រំកាយ និងកីឡា ចំនួន៥ចំណុច រួមមាន៖ ១.អភិវឌ្ឍក្របខណ្ឌច្បាប់ និងគតិយុត្តិ ២.អភិវឌ្ឍកីឡាកម្រិតខ្ពស់ ៣.អភិវឌ្ឍកីឡាសម្រាប់ទាំងអស់គ្នា ៤.អភិវឌ្ឍវិស័យអប់រំកាយ និងកីឡា នៅគ្រប់គ្រឹះស្ថានសិក្សា និងសហគមន៍ និង ៥.អភិរក្ស និងអភិវឌ្ឍកីឡាគ្រប់ប្រភេទ។

លោក ស សុខា រដ្ឋលេខាធិការក្រសួងអប់រំ យុវជន និងកីឡា ថ្លែងក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរអប់រំ យុវជន និងកីឡា ខេត្តស្វាយរៀង នៅព្រឹកថ្ងៃទី១៦ ខែតុលានេះ (រូបថត៖ ផ្ដល់ឲ្យ)

ការថ្លែងបញ្ជាក់នេះ ត្រូវបានធ្វើឡើងក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរអប់រំ យុវជន និងកីឡា ខេត្តស្វាយរៀង នៅព្រឹកថ្ងៃទី១៦ ខែតុលានេះ។

ដើម្បីឆ្លើយតបទៅនឹងយុទ្ធសាស្ត្រកំណែទម្រង់ការអភិវឌ្ឍវិស័យអប់រំកាយ និងកីឡា ព្រមទាំងអភិវឌ្ឍវិស័យកីឡាឆ្ពោះទៅឆ្នាំ២០២៣ លោក ស សុខា បានសំណូមពរទៅមន្ទីរអប់រំ យុវជន និងកីឡា ខេត្តស្វាយរៀង ចំនួន៩ចំណុច ដូចជា៖

១- រៀបចំ និងពង្រឹងការអនុវត្តផែនការសកម្មភាពអប់រំកាយ និងកីឡាប្រចាំឆ្នាំ

២- ពង្រឹង និងពង្រីកធនធានមនុស្សលើវិស័យអប់រំកាយ និងកីឡា

៣- ស្នើសុំរៀបចំកញ្ចប់ថវិកាប្រចាំឆ្នាំ សម្រាប់អនុវិស័យអប់រំកាយ និងកីឡា ឲ្យបានសមស្រប

៤- រៀបចំផែនការជួសជុល កែលម្អទីលាន និងបំពាក់សម្ភារកីឡា សម្រាប់ហាត់ហ្វឹកហ្វឺន និងប្រកួត

៥- ត្រួតពិនិត្យតាមដានអនុវត្ត ការងារអប់រំកាយក្នុងម៉ោងសិក្សា និងកីឡាក្រៅម៉ោងសិក្សា

៦- ពង្រឹងការរៀបចំកីឡាថ្នាក់ខេត្ត ដើម្បីស្វែងរកកីឡាករល្អៗ និងមានទេពកោសល្យចូលរួមការប្រកួតថ្នាក់ជាតិ

៧- ចូលរួមប្រកួតកីឡាថ្នាក់ជាតិ

៨- ត្រួតពិនិត្យតាមដាន និងវាយតម្លៃការហាត់ ក៏ដូចជា បង្ហាត់អប់រំកាយ និងកីឡា

៩- ធ្វើរបាយការណ៍ជូនក្រសួងអប់រំ យុវជន និងកីឡា ឲ្យបានទៀងទាត់៕

អត្ថបទ៖ សោភា