ក្រសួង អំពាវនាវឲ្យជនពិការបញ្ឈប់ការច្រៀងតាមផ្លូវសាធារណៈ

2018-10-17 23:19:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសង្គមកិច្ច អំពាវនាវឲ្យជនពិការបញ្ឍប់ការច្រៀងតាមដងផ្លូវសាធារណ: ដើម្បីរក្សាបានសេចក្តីថ្លៃថ្នូរ និងសណ្តាប់ធ្នាប់។ នេះបើតាមការចុះផ្សាយរបស់វេបសាយក្រសួងព័ត៌មាន កាលពីថ្ងៃទី១៦ ខែតុលា ឆ្នាំ២០១៨។

ជនពិការ ច្រៀងនៅតាមទីសាធារណៈ (រូបថត៖ ក្រសួងព័ត៌មាន)

លោក ឯម ច័ន្ទមករា អគ្គលេខាធិការនៃអគ្គលេខាធិការដ្ឋាន ក្រុមប្រឹក្សាសកម្មភាពជនពិការ នៃក្រសួងសង្គមកិច្ច អតីតយុទ្ធជន និងយុវនីតិសម្បទាបានលើកទឹកចិត្តឲ្យក្រុមតន្រ្តីជនពិការរួបរួមគ្នាឡើងវិញជាក្រុមធំៗ ហើយទៅច្រៀងនៅក្នុងបរិវេណរមណីយដ្ឋានវត្តភ្នំ ដែលអាជ្ញាធរផ្តល់ឲ្យ ដើម្បីធានាបានសេចក្តីថ្លៃថ្នូរ និងមិនប៉ះពាល់សោភ័ណភាពរាជធានីភ្នំពេញ។

ការបន្តអំពាវនាវនេះ បន្ទាប់ពីក្រុមតន្រ្តីជនពិការនៅតែបន្តសម្តែងនៅតាមភ្លើងស្តុប តាមផ្សារ និងតាមទីសាធារណៈ ដែលធ្វើឲ្យបាត់បង់សណ្តាប់ធ្នាប់ និងប៉ះពាល់ដល់កិត្តិយសរបស់ជនពិការ ខណៈដែលអាជ្ញាធរបានធ្វើការហាមប្រាម។

លោក ឯម ច័ន្ទមករា បានថ្លែងប្រាប់កុ្រមអ្នកសារព័ត៌មានក្រោយបញ្ចប់ពិធីអបអរសាទរទិវាមនុស្សគថ្លង់ហើយបានអះអាងថា រាជរដ្ឋាភិបាលកម្ពុជាសព្វថ្ងៃនេះ បានឧបត្ថម្ភឧបករណ៍ភ្លេងតន្រ្តីសម័យសម្រាប់ជនពិការ ហើយបង្កើតជាក្រុមលេងនៅតំបន់រមណីយដ្ឋានវត្តភ្នំ និងលេងនៅតាមបុណ្យប្រពៃណីជាតិ និងបុណ្យរបស់ប្រជាពលរដ្ឋ ដែលមិនបង្កផលប៉ះពាល់ដល់សណ្តាប់ធ្នាប់សាធារណៈឡើយ ហើយពួកគាត់អាចស្វែងរកប្រាក់កម្រៃសម្រាប់ផ្គត់ផ្គង់ជីវភាពផងដែរ។

លោក ក៏បានអំពាវនាវដល់ប្រជាពលរដ្ឋ ក្រុមហ៊ុនក្រសួង ស្ថាប័ននានា ជួយជួលក្រុមតន្រ្តីជនពិការទៅសម្តែងក្នុងកម្មវិធីផ្សេងៗ ដើម្បីចូលរួមចំណែកលើកកម្ពស់ជីវភាពជនពិការដែលកំពុងខ្វះខាត៕

អត្ថបទ៖ លាភ.