៤នាក់ស្លាប់ ដោយសាររន្ទះបាញ់ក្នុងពេលនិយាយទូរសព្ទ និងនៅទីវាល ក្នុងខេត្ត២
- 2018-10-21 02:23:17
- ចំនួនមតិ 0 | ចំនួនចែករំលែក 0
៤នាក់ស្លាប់ ដោយសាររន្ទះបាញ់ក្នុងពេលនិយាយទូរសព្ទ និងនៅទីវាល ក្នុងខេត្ត២
ចន្លោះមិនឃើញ
ពលរដ្ឋ៤នាក់បានស្លាប់ និង២នាក់ទៀតរងរបួស ដោយសាររន្ទះបាញ់ កាលពីថ្ងៃទី១៩ ខែតុលា នៅឃុំរាម ស្រុកព្រៃនប់ ខេត្តព្រះសីហនុ។ នគរបាលខេត្តព្រះសីហនុ បានឱ្យដឹងថា ខណៈដែលកំពុងមានភ្លៀងស្រិចៗ ជនរងគ្រោះបាននាំគ្នាទៅជ្រកក្នុងរោង ប៉ុន្តែពេលនោះមានកម្មករម្នាក់និយាយទូរសព្ទបណ្ដាលឲ្យរន្ទះបាញ់វាយប្រហារតែម្ដង។
ដោយឡែក នៅខេត្តបន្ទាយមានជ័យឯណោះវិញ កាលពីថ្ងៃទី១៨តុលា ក៏មានពលរដ្ឋ៣នាក់ បានស្លាប់ដោយរន្ទះបាញ់ដែរ ខណៈពួកគេកំពុងអង្គុយជុំគ្នា នៅទីវាលក្នុងភូមិ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ធ្លាប់បានប្រាប់អាស៊ីសេរី ថា ប្រជាពលរដ្ឋរស់នៅជនបទ ដែលនៅឆ្ងាយពីតំបន់ការពាររន្ទះ ត្រូវប្រុងប្រយ័ត្នក្នុងពេលមានភ្លៀង ជាពិសេសកសិករ គប្បីចាកចេញពីវាលស្រែឲ្យឆ្ងាយ ពីប្រភពទឹក និងកុំនៅជ្រកក្រោមដើមឈើខ្ពស់ៗ ដែលងាយរងគ្រោះដោយបាតុភូតរន្ទះ។
លោកក៏បាន ទទូចឲ្យពលរដ្ឋព្យាយាមសម្ងំនៅក្នុងផ្ទះជានិច្ច នៅពេលមានភ្លៀងធ្លាក់ ខ្យល់បោកបក់រកភ្លៀង និងផ្គររន្ទះ។ ចំពោះ ប្រជាពលរដ្ឋដែលធ្វើការនៅតាមទីវាល ឬនៅក្បែរប្រភពទឹក នៅពេលមានភ្លៀង ត្រូវរួសរាន់ត្រឡប់មកផ្ទះ បិទទូរស័ព្ទនិងវិទ្យុ កុំកាន់របស់អ្វី ដែលអាចចម្លងអគ្គិសនី កុំទៅជ្រកនៅក្រោមដើមឈើ ហើយត្រូវនៅឲ្យឆ្ងាយប្រមាណចម្ងាយពី ៣ ទៅ ៤ម៉ែត្រ ពីក្រោមដើមឈើ ដើម្បីជៀសវាងការឆ្លងចរន្តអគ្គិសនីនៅពេលដែលមានរន្ទះ៕