ឥណ្ឌូណេស៊ី កូរ៉េខាងត្បូង សហការគ្នាផលិតយន្តហោះចម្បាំង

2018-10-22 07:32:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងអភិវឌ្ឍយន្តហោះចម្បាំងរវាងកូរ៉េខាងត្បូង ជាមួយ ឥណ្ឌូណេស៊ី បានដំណើរការហើយ ស្របពេលដែលឥណ្ឌូណេស៊ី នឹងត្រូវរួមចំណែកទឹកប្រាក់ប្រមាណជា ២០០លានដុល្លារទៀត។ នេះបើតាមការបញ្ជាក់ពីទីភ្នាក់ងារដែលទទួលបន្ទុកកម្មវិធីទិញអាវុធ ដែលហៅកាត់DAPA របស់កូរ៉េខាងត្បូង នៅថ្ងៃទី២២ ខែតុលា ឆ្នាំ២០១៨។

ម៉ូដែលគំរូ យន្តហោះចម្បាំង KF-X (រូបថត៖ sputniknews)

គម្រោងអភិវឌ្ឍយន្តហោះចម្បាំង "KF-X” ត្រូវការទំហំទឹកប្រាក់ប្រមាណជា ៧,៩ ពាន់លានដុល្លារអាមេរិក ដែលក្នុងនោះឥណ្ឌូណេស៊ី រួមចំណែកទឹកប្រាក់ប្រមាណជា ២០% ។ ឥណ្ឌូណេស៊ី និងកូរ៉េខាងត្បូង បានចុះកិច្ចព្រមព្រៀងគ្នាកាលពីឆ្នាំ២០១៤ លើគម្រោងនេះ។

ក្រសួងហិរញ្ញវត្ថុឥណ្ឌូណេស៊ី បានឲ្យដឹងនៅថ្ងៃទី២២តុលានេះថា រដ្ឋាភិបាលឥណ្ឌូណេស៊ីបានសម្រេចពន្យារពេលការចំណាយក្នុងឆ្នាំ២០១៧ សម្រាប់គម្រោងខាងលើ។ ប៉ុន្តែលោកមិនបានបញ្ជាក់ពីមូលហេតុនៃការពន្យារពេលនេះទេ។ ចំណែក កូរ៉េខាងត្បូង កំពុងរកវិធីសាស្ត្រថ្មីមួយ ដើម្បីឲ្យឥណ្ឌូណេស៊ីអាចរួមចំណែកបន្តទៀត។

លោក Tom Lembong ប្រធានក្រុមប្រឹក្សាភិបាលវិនិយោគឥណ្ឌូណេស៊ី បានប្រាប់អ្នកសារព័ត៌មានថា ក្រុងហ្សាកាតា ប្រហែលជាពិនិត្យឡើងវិញនូវគម្រោងខាងលើ ពីចំនួនយន្តហោះដែលឥណ្ឌូណេស៊ីត្រូវទិញ កាលវិភាគដឹកជញ្ជូន និងភាពបត់បែនដើម្បីលក់យន្តហោះទៅកាន់ប្រទេសទី៣។

គួរបញ្ជាក់ថា ទីភ្នាក់ងារសារព័ត៌មាន Antara បានរាយការណ៍កាលពីខែឧសភាថា ឥណ្ឌូណេស៊ីមិនត្រូវបានអនុញ្ញាតឲ្យលក់យន្តហោះចម្បាំង KF-X ទៅកាន់ប្រទេសទី៣ ឬ ផលិតគ្រឿងបង្គំក្នុងស្រុកឡើយ។ ជុំវិញបញ្ហានេះ អ្នកនាំពាក្យក្រសួងការពារជាតិឥណ្ឌូណេស៊ី មិនអាចឆ្លើយតបបាននោះទេ៕

សូមជម្រាបថា ឥណ្ឌូណេស៊ី ធ្លាប់អះអាងថា ខ្លួននឹងទិញយន្តហោះ KF-X ចំនួន ៤៨គ្រឿង៕

ប្រភព៖ Reuters ប្រែសម្រួល៖ លាភ.