លោក អ៊ិត សារម្យ និងបុគ្គល២នាក់ទៀត ស្នើសុំបង្កើតគណបក្សនៅក្រសួងមហាផ្ទៃ

2018-10-22 08:59:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អ៊ិត សារម្យ ប្រធានគណបក្សបំណងពលរដ្ឋ លោក អ៊ុក សុភ័ណ្ឌ ប្រធានគណបក្សរដ្ឋអច្ឆរិយៈ និងលោក ប៉ែន សំអឿន ប្រធានគណបក្សកម្រងផ្កាស្មៅមហាជន បានស្នើសុំបង្កើតគណបក្សនៅក្រសួងមហាផ្ទៃ។ នេះបើយោងតាមរបាយការណ៍របស់នាយកដ្ឋានកិច្ចការសមាគម និងគណបក្សនយោបាយ នៃអគ្គនាយកដ្ឋានរដ្ឋបាលក្រសួងមហាផ្ទៃ ដែល [ខ្លីៗ] ទទួលបាននៅព្រឹកថ្ងៃទី២២ ខែតុលា ឆ្នាំ២០១៨។

បច្ចុប្បន្ន គណបក្សនយោបាយដែលបានបង្កើត និងចុះបញ្ជីនៅក្រសួងមហាផ្ទៃ មានចំនួនសរុប ៤៤គណបក្ស ដោយក្នុងនោះ គណបក្សនយោបាយដែលបានបង្កើត តែមិនចុះបញ្ជីមានចំនួន៣ គឺគណបក្សខាងលើនេះ និងគណបក្សនយោបាយបានចុះបញ្ជីមានចំនួន៤១។

សូមជម្រាបថា បើតាមការចុះផ្សាយរបស់វិទ្យុវាយោ លោក អ៊ិត សារម្យ បានប្រឡូកនយោបាយ តាំងពីកម្ពុជារៀបចំការបោះឆ្នោតអាណត្តិទីមួយមកម្ល៉េះ។ ដំបូងលោកបានចូលរួម ក្នុងចលនាយុវជន របស់គណបក្សហ៊្វុនស៊ីនប៉ិក និងក្រោយមកបានចូលរួមជីវភាពនយោបាយ ជាមួយគណបក្សជាតិខ្មែរ ដែលបានប្តូរឈ្មោះជា គណបក្សសម រង្ស៊ី។ លោក អ៊ិត សារម្យ បានបន្តប្តូរទ្រនំទៀត ដោយមកចូលរួមបង្កើតគណបក្សសម្ព័ន្ធដើម្បីប្រជាធិបតេយ្យ នៅឆ្នាំ២០០៦។ ប៉ុន្តែ ក្រោយរួមរស់នៅជាមួយគ្នាបាន៦ឆ្នាំ លោកត្រូវបានបណ្តេញចេញពីគណបក្សនេះ នៅឆ្នាំ២០១២ ដោយសារទំនាស់ផ្ទាល់ខ្លួន។

លោក អ៊ិត សារម្យ ដែលធ្លាប់ចូលរួមបង្កើតគណបក្សសម្ព័ន្ធដើម្បីប្រជាធិបតេយ្យ

នាយកដ្ឋានកិច្ចការសមាគម និងគណបក្សនយោបាយ បង្ហាញទៀតថា ស្ថានភាពគណបក្សនយោបាយដែលបានបង្កើត និងចុះបញ្ជីនៅក្រសួងមហាផ្ទៃ គិតត្រឹមឆ្នាំ២០១៣ មានចំនួន ៨០គណបក្ស។

នៅឆ្នាំ២០១៤ ក្រសួងមហាផ្ទៃ បានសម្រេចលុបឈ្មោះគណបក្សនយោបាយចំនួន ២៤គណបក្ស ដូច្នេះគណបក្សនយោបាយដែលនៅសល់មានចំនួន ៥៦គណបក្ស។

គិតចាប់ពីឆ្នាំ២០១៥ ដល់ឆ្នាំ២០១៧ ក្រសួងមហាផ្ទៃ បានសម្រេចបង្កើត និងចុះបញ្ជីគណបក្សនយោបាយចំនួន ១៨គណបក្ស (បង្កើត១០ ចុះបញ្ជី០៨) និងបានលុបឈ្មោះគណបក្សនយោបាយចំនួន ៣៨គណបក្ស៕