ADB ផ្តល់ហិរញ្ញប្បទានជិត ៩០លានដុល្លារ សម្រាប់អភិវឌ្ឍក្រុងចំនួន៣ របស់កម្ពុជា

2018-10-24 07:27:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោកស្រី Durrani-Jamal នាយិកាស្ថានតំណាងធនាគារអភិវឌ្ឍន៍អាស៊ី (ADB) ប្រចាំកម្ពុជា បានចុះហត្ថលេខាលើកិច្ចព្រមព្រៀងហិរញ្ញប្បទានសម្រាប់គម្រោង និងកម្មវិធីចំនួន៤ ដែលមានទឹកប្រាក់សរុបជិត ២៥០លានដុល្លារ។ ក្នុងនោះទឹកប្រាក់ ៨៨,៥០លានដុល្លារ នឹងត្រូវប្រើប្រាស់សម្រាប់គម្រោងអភិវឌ្ឍន៍ទីក្រុងរបៀងនៃមហាអនុតំបន់មេគង្គជំហានទី៤។

តាមសេចក្តីជូនដំណឹងរបស់ក្រសួងសេដ្ឋកិច្ច នៅថ្ងៃទី២៤ ខែតុលា ឆ្នាំ២០១៨ ឱ្យដឹងថា គម្រោងនេះនឹងជួយលើកកម្ពស់សមាហរណកម្មសេដ្ឋកិច្ចក្នុងតំបន់តាមរយៈការអភិវឌ្ឍក្នុងរបៀងអាទិភាពចំនួន០៣ គឺក្រុងកំពង់ចាម ក្រចេះ និងស្ទឹងត្រែង ដែលជាក្រុងរបៀងនៃមហាអនុតំបន់មេគង្គ។ ការអភិវឌ្ឍនេះ រួមមាន៖ ការសាងសង់ស្ថានីយប្រព្រឹត្តកម្មទឹកកខ្វក់ ការតភ្ជាប់ប្រព័ន្ធលូរំដោះទឹកដល់ប្រជាជន ការសាងសង់ទីលានចាក់សំរាម និងការសាងសង់ស្ថានីយបូមទឹកកខ្វក់។

ស្ពានគីហ្ស៊ូណា ក្នុងក្រុងកំពង់ចាម ខេត្តកំពង់ចាម (រូបថត៖ Flickr Province of Cambodia)

ចំណែកគម្រោង៣ទៀតរួមមាន៖

-កម្មវិធីអភិវឌ្ឍន៍វិស័យអប់រំកម្រិតមធ្យមសិក្សាទុតិយភូមិជំហានទី២៖ គ្រោងចំណាយថវិកាសរុបប្រមាណ ៥៣,៥០លានដុល្លារ

-គម្រោងកែលម្អការគ្រប់គ្រងបរិស្ថានក្រុងជុំវិញបឹងទន្លេសាបជំហានទី២៖ គ្រោងចំណាយថវិកាសរុបប្រមាណ ៩៧,៧០លានដុល្លារ សម្រាប់ការអភិវឌ្ឍ និងការកែលម្អហេដ្ឋារចនាសម្ព័ន្ធរូបវន្តក្រុងអាទិភាពចំនួន៣ ប្រព័ន្ធបណ្តាញលូ និងសាងសង់ទីលានចាក់សំរាម។

-គម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍សម្រាប់កំណើនប្រកបដោយបរិយាប័ន្នក្នុងមហាអនុតំបន់មេគង្គជំហានទី២៖ គ្រោងចំណាយថវិកាវិនិយោគសរុបប្រមាណ ៣០,៨៩លានដុល្លារ ក្នុងគោលបំណងបង្កើនការទាក់ទាញទេសចរណ៍ក្នុងខេត្តគោលដៅចំនួន២ (កែប និងព្រះសីហនុ)៕