ចិន បន្តផ្តល់ជំនួយយោធា និងធ្វើសមយុទ្ធជាមួយកម្ពុជា

2018-10-25 02:26:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយឧត្តមសេនីយ៍ Wei Fenghe រដ្ឋមន្រ្តីក្រសួងការពារជាតិចិន បានចុះហត្ថលេខាលើពិធីសារស្តីអំពីការផ្តល់ជំនួយយោធាឥតសំណង ជាមួយសម្តេច ទៀ បាញ់ រដ្ឋមន្រ្តីក្រសួងការពារជាតិកម្ពុជា កាលពីថ្ងៃទី២៣ ខែតុលា ឆ្នាំ២០១៨។ នេះបើតាមការចុះផ្សាយនៅលើទំព័រហ្វេសប៊ុកផ្លូវការរបស់សម្តេច ទៀ បាញ់។

ពិធីចុះហត្ថលេខានេះ ធ្វើឡើងក្នុងអំឡុងពេលដែលសម្តេច ទៀ បាញ់ បានដឹកនាំគណៈប្រតិភូយោធាជាន់ខ្ពស់កម្ពុជា ទៅបំពេញទស្សនកិច្ចផ្លូវការ និងចូលរួមវេទិកាជជែកសន្ទនាកិច្ចការយោធា និងសន្តិសុខ Beijing Xiangshan Forum នៅក្រុងប៉េកាំង ប្រទេសចិន ពីថ្ងៃទី២២ ដល់ ២៧ ខែតុលា ឆ្នាំ២០១៨។

សម្តេច ទៀ បាញ់ ក្នុងពិធីចុះហត្ថលេខាជាមួយនាយឧត្តមសេនីយ៍ Wei Fenghe នៅក្រុងប៉េកាំង កាលពីថ្ងៃទី២៣ តុលា ឆ្នាំ២០១៨។ រូបថត៖ FB លោក ឈុំ សុជាត

យ៉ាងណាមិញ ទំព័រហ្វេសប៊ុកដដែលនេះ មិនបានបញ្ជាក់ពីទំហំទឹកប្រាក់នៃជំនួយរបស់ចិននេះទេ។ បើតាមលោក ឈុំ សុជាតិ អ្នកនាំពាក្យក្រសួងការពារជាតិ ត្រូវបាន VoA ដកស្រង់សម្តីកាលពីថ្ងៃទី២៤តុលាថា លោកមិនទាន់មានព័ត៌មានគ្រប់គ្រាន់ដើម្បីផ្សព្វផ្សាយ ទាក់ទិននឹងកញ្ចប់ជំនួយថ្មីផ្តល់ឱ្យដោយកងទ័ពចិនឡើយ។

នេះជាការបញ្ចេញនូវកញ្ចប់ជំនួយសឹកថ្មីផ្សេងទៀតរបស់ចិនមកដល់កម្ពុជា បន្ទាប់ពីបានចុះហត្ថលេខា ផ្តល់ជំនួយយោធាក្នុងតម្លៃទឹកប្រាក់ប្រមាណ ១០០លានដុល្លារអាមេរិក តាមរយៈដំណើរទស្សនកិច្ចរបស់លោក Wei Fenghe រដ្ឋមន្ត្រីការពារជាតិចិន នៅរាជធានីភ្នំពេញ កាលពីខែមិថុនាកន្លងទៅ។

បើតាមព័ត៌មានដែលលោក ឈុំ សុជាតិ បង្ហោះនៅលើទំព័រហ្វេសប៊ុករបស់លោក ឱ្យដឹងថា នៅក្នុងឱកាសជួបពិភាក្សាទ្វេភាគីនោះ សម្ដេច ទៀ បាញ់ បានលើកឡើងអំពីភាពវិជ្ជមាន នៃទំនាក់ទំនងកិច្ចសហប្រតិបត្តិការរវាងប្រទេសកម្ពុជា-ចិន ដែលរីកចម្រើនទៅមុខយ៉ាងឆាប់រហ័ស ដែលក្លាយជាកិច្ចសហប្រតិបត្តិការភាពជាដៃគូយុទ្ធសាស្រ្ត គ្រប់ជ្រុងជ្រោយ។

ចំណែកភាគីចិន បានសន្យាបន្តជំរុញការរក្សាផ្លាស់ប្ដូរ ប្រតិភូជាន់ខ្ពស់រវាងកងទ័ពទាំងពីរជាបន្តទៅទៀត បន្តធ្វើលំហាត់នាគមាស ដែលនឹងធ្វើឡើងនៅខែមីនា ឆ្នាំ២០១៩ បន្តជួយកសាងសង់វិទ្យាស្ថានទ័ពជើងគោកថ្លុកតាសេក រួមទាំងបន្តជួយហ្វឹកហ្វឺនបណ្តុះបណ្តាលធនធានមនុស្សដល់ កងយោធពលខេមរភូមិន្ទផងដែរ។

សមយុទ្ធយោធារវាងកម្ពុជា-ចិន កាលពីខែមីនា ឆ្នាំ២០១៨

សូមរំលឹកថា កម្ពុជា និងចិន បានធ្វើលំហាត់ហ្វឹកហ្វឺន «នាគមាស» ពីរដងរួចមកហើយ ដែលលើកដំបូងក្នុងខែធ្នូ ឆ្នាំ២០១៦ និងលើកទីពីរ ដែលមានទំហំជាងមុន ធ្វើនៅខែមីនា ឆ្នាំ២០១៨នេះ ដែលរួមមានទាំងការប្រើប្រាស់រថក្រោះ និងការវាយប្រយុទ្ធទីតាំងខ្មាំងពីលើឧទ្ធម្ភាគចក្រពិឃាដផងដែរ៕