បណ្តាផ្លូវជាតិក្នុងខេត្តកណ្តាល នឹងត្រូវពង្រីកចិញ្ចើមផ្លូវរហូតដល់ ១៥ម៉ែត្រ

2018-10-26 01:51:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បណ្តាផ្លូវជាតិក្នុងភូមិសាស្រ្តខេត្តកណ្តាល រួមមាន៖ ផ្លូវជាតិលេខ១ ផ្លូវជាតិលេខ២ ផ្លូវជាតិលេខ៥ ផ្លូវជាតិលេខ៦ ផ្លូវជាតិលេខ១៤ ផ្លូវជាតិលេខ២០បេ ផ្លូវជាតិលេខ២១ ផ្លូវជាតិលេខ២១អា ផ្លូវជាតិលេខ២១បេ ផ្លូវជាតិលេខ៣៤ ផ្លូវលេខ១១០ និងផ្លូវលេខ១៥១អា នឹងត្រូវចាប់ផ្តើមពង្រីកចិញ្ចើមផ្លូវរហូតដល់ ១៥ម៉ែត្រ ចាប់ពីថ្ងៃទី១៤ វិច្ឆិកា ២០១៨តទៅ។ នេះបើតាមសេចក្តីជូនដំណឹងរបស់មន្ទីរសាធារណការ និងដឹកជញ្ជូនខេត្តកណ្តាល កាលពីថ្ងៃទី២៥ ខែតុលា ឆ្នាំ២០១៨។

ផ្លូវជាតិលេខ៦ នៅតំបន់ព្រែកលៀប រាជធានីភ្នំពេញ (រូបតំណាង)

មន្ទីរសាធារណការខេត្ត បានអំពាវនាវឱ្យប្រជាពលរដ្ឋដែលមានលំនៅឋាន ក្បាលដី ឬបាននឹងកំពុងសាងសង់តូបអាជីវកម្ម ដែលស្ថិតនៅតាមបណ្តោយផ្លូវជាតិខាងលើនេះ រំកិលយ៉ាងតិចណាស់ ឱ្យបាន ១៥ម៉ែត្រពីអ័ក្សផ្លូវ ចាប់ពីការជូនដំណឹងនេះ រហូតដល់ថ្ងៃទី១៣ ខែវិច្ឆិកា ឆ្នាំ២០១៨។

ការជូនដំណឹងខាងលើនេះ គឺអនុវត្តតាមយុទ្ធនាការ ១០០ថ្ងៃ របស់រដ្ឋមន្រ្តីក្រសួងសាធារណការ និងដឹកជញ្ជូន ដោយមន្ទីរសាធារណការខេត្ត ទទួលការថែទាំផ្លូវជាតិ ផ្លូវខេត្តជាប្រចាំ ព្រមទាំងជួសជុលលុបសំបុកមាន់ ធានាឱ្យបាននូវស្ថានភាពផ្លូវល្អជានិច្ចតាមផែនការ និងកិច្ចសន្យា៕