ត្រាំ គ្រោងទាត់ចោលច្បាប់ទទួលបានសញ្ជាតិអាមេរិក ពេលកើតលើទឹកដីអាមេរិក

2018-10-31 02:02:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប្រធានាធិបតីអាមេរិក ដូណាល់ ត្រាំ បានថ្លែងថា លោកនឹងបញ្ចប់ការទទួលបានសញ្ជាតិអាមេរិក សម្រាប់កូនដែលកើតនៅលើទឹកដីអាមេរិក ក្នុងគ្រួសារដែលឪពុកម្ដាយ ជាជនអន្តោប្រវេសន៍។

លោក ដូណាល់ ត្រាំ ប្រធានាធិបតីអាមេរិក ថ្លែងទៅកាន់អ្នកសម្របសម្រួលក្នុងកិច្ចសម្ភាសរបស់ប៉ុស្តិ៍ទូរទស្សន៍ HBO កាលពីថ្ងៃទី៣០ ខែតុលា ឆ្នាំ២០១៨

ការថ្លែងរបស់លោក ត្រាំ ត្រូវបានធ្វើឡើងក្នុងកិច្ចសម្ភាសមួយក្នុងកម្មវិធីរបស់ប៉ុស្តិ៍ទូរទស្សន៍ HBO កាលពីថ្ងៃទី៣០ ខែតុលា ឆ្នាំ២០១៨ មុនការបោះឆ្នោតពាក់កណ្ដាលអាណត្តិ ដែលគ្រោងធ្វើឡើងនៅសប្ដាហ៍ក្រោយ។

ជំហររបស់លោកប្រធានាធិបតីអាមេរិក ត្រូវចាត់ទុកជាការប្រមាថរដ្ឋធម្មនុញ្ញអាមេរិក ដែលបានធ្វើវិសោធនកម្ម កាលពី១៥០ឆ្នាំមុន ដែលចែងថា អ្នកទាំងឡាយដែលកើត ឬធំធាត់នៅទឹកដីអាមេរិក និងតាមយុត្តាធិការ គឺជាប្រជាពលរដ្ឋអាមេរិក។

លោក ត្រាំ មិនបានបញ្ជាក់ពីកាលបរិច្ឆេទជាក់លាក់ដែលលោកនឹងចុះហត្ថលេខាលើបទបញ្ជាប្រតិបត្តិ ដើម្បីគាំទ្រការបញ្ចប់ការទទួលបានសញ្ជាតិអាមេរិកសម្រាប់កូនដែលកើតនៅលើទឹកដីអាមេរិកនោះទេ។

ប្រសាសន៍របស់លោកត្រាំ ធ្វើឡើងបន្ទាប់ពី លោកបានប្រកាសកាលពីថ្ងៃទី២៩ ខែតុលា ឆ្នាំ២០១៨ ថា លោកនឹងបញ្ជូនកងទ័ព ៥២០០នាក់ ទៅជួយរក្សាសន្តិសុខព្រំដែនជាមួយម៉ិកស៊ីកូ ដែលនេះជាជំហរកាន់តែតឹងរ៉ឹងលើបញ្ហាអន្តោប្រវេសន៍ មុនការបោះឆ្នោតពាក់កណ្ដាលអាណត្តិដែលនឹងធ្វើឡើងនៅថ្ងៃទី៦ ខែវិច្ឆិកា ឆ្នាំ២០១៨៕

ប្រភព៖ CNN ប្រែសម្រួល៖ លាភ.