អ្នកនិពន្ធរឿង គួកជីង យ៉ាងគួរ ចាងអ៊ូជី ទទួលមរណភាពហើយ កាលពីម្សិលមិញ

2018-10-31 04:37:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Louis Cha ដែលជាអ្នកនិពន្ធរឿងប្រលោមលោកគុននិយមចិនដ៏ល្បីល្បាញ បានទទួលមរណភាពហើយ ក្នុងអាយុ ៩៤ឆ្នាំ បន្ទាប់ពីធ្លាក់ខ្លួនឈឺ អស់រយៈពេលជាយូរមក។

កាសែត Ming Pao Daily News ដែលលោក Louis Cha ជាស្ថាបនិក និង មានមូលដ្ឋាននៅហុងកុង បញ្ជាក់ថា លោកបានទទួលមរណភាពកាលពីថ្ងៃទី៣០ ខែតុលា ឆ្នាំ២០១៨ ក្នុងមន្ទីរពេទ្យមួយកន្លែង នៅក្រុងនេះ។

លោក Louis Cha ឡើងថ្លែងសុន្ទរកថាមួយ ក្នុងអំឡុងពេលលោកនៅមានជីវិត (រូបថត៖ China Daily)

គួរបញ្ជាក់ថា រឿងប្រលោមលោក ដែលលោក Louis Cha និពន្ធ ត្រូវបានលក់ដាច់អស់រាប់លានក្បាល ហើយដែលភាគច្រើនបំផុតស្ថិតក្នុងប្រទេសដែលនិយាយភាសាចិន។ រឿងរបស់លោកភាគច្រើន ត្រូវបានយកទៅធ្វើជាខ្សែភាពយន្ត រឿងភាគទូរទស្សន៍ ល្ខោនវិទ្យុ និង សៀវភៅបែបកំប្លែង ព្រមទាំងធ្វើជាហ្គេមវីដេអូផងដែរ។ ក្រៅពីនេះ ស្នាដៃរបស់លោក ក៏ត្រូវបានបកប្រែទៅជាច្រើនភាសាដូចជា ភាសាបារាំង អង់គ្លេស កូរ៉េ ជប៉ុន វៀតណាម ថៃ ភូមា ម៉ាឡេ ឥណ្ឌូនេស៊ី និង ភាសាខ្មែរ ជាដើម។

សៀវភៅរឿងឥន្ទ្រីសេនាក្លាហាន របស់លោក Louis Cha ដែលត្រូវបានប្រែសម្រួលជាភាសាខ្មែរ

រឿងល្បីៗរបស់លោក ដែលប្រជាជនខ្មែរភាគច្រើនបានស្គាល់ គឺមានដូចជា រឿងអ្នកក្លាហានគួកជីង រឿងឥន្រ្ទីសេនាក្លាហាន (យ៉ាងគួរ និងសៀវ ឡុងនី) និងរឿងដាវទេវតា និងកាំបិតប្រហារនាគ (ចាង អ៊ូជី) ជាដើម។

សូមរំលឹកថា លោក Louis Cha កើតក្នុងឆ្នាំ១៩២៤ នៅក្រុង Hangzhou ខេត្ត Zhejiang ប្រទេសចិន។ រឿងដែលលោកបាននិពន្ធដំបូងបំផុតគឺមានចំណងជើងថា «គម្ពីរ និង ដាវ (The Book and the Sword)» ត្រូវបានបោះពុម្ពផ្សាយក្នុងឆ្នាំ ១៩៥៥៕

ប្រភព៖ Khaosod English ប្រែសម្រួល៖ សំភី