លោកស៊ុន ចាន់ថុល ជំរុញឲ្យប្រើប្រាស់ App ថ្មីមួយ ដើម្បីរួមចំណែកជួសជុលផ្លូវសំបុកមាន់

2018-10-31 09:48:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ក្រសួងនឹងដាក់ដំណើរការកម្មវិធី App ថ្មីមួយនៅលើ Store របស់ស្មាតហ្វូន ដើម្បីឲ្យប្រជាពលរដ្ឋថតផ្លូវសំបុកមាន់ រួចបញ្ជូនមកកាន់ក្រសួង ដើម្បីឲ្យក្រសួងចាត់វិធានការ ជួសជុលជាបន្ទាន់។ App នេះ នឹងត្រូវដាក់ឲ្យដំណើរការ នៅខែវិច្ឆិកា ឬយ៉ាងយូរនៅខែធ្នូ ឆ្នាំ២០១៨ខាងមុខ។

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងពី App នេះ ក្នុងពិធីដាក់ឲ្យដំណើរការ នូវមជ្ឈមណ្ឌលបណ្ដុះបណ្ដាល បើកបររថយន្តធុនធ្ងន់ នៅថ្ងៃទី៣១ ខែតុលា ឆ្នាំ២០១៨។

លោករដ្ឋមន្ត្រីមានប្រសាសន៍ថា App នេះ មានសារសំខាន់ណាស់ នៅពេលពលរដ្ឋថតបញ្ជូនមកភ្លាម កម្មវិធីនៅក្នុង App នឹងដឹងទីតាំងពិតប្រាកដ តើមានសំបុកមាន់នៅកន្លែងណា? ម៉ោងណាគាត់ថតផ្លូវសំបុកមាន់មកក្រសួង? ដូច្នេះក្រសួងបានព័ត៌មានទាំងនេះ រួចបញ្ជូនទៅតាមមន្ទីរសាធារណការខេត្ត ក្រុង ដើម្បីឲ្យពួកគាត់ចុះទៅពិនិត្យនៅកន្លែងផ្ទាល់ និងជួសជុលផ្លូវសំបុកមាន់ភ្លាមៗ។

លោក ស៊ុន ចាន់ថុល ថ្លែងបន្ថែមថា នៅក្នុង App នឹងមានរូបថតប្រធានមន្ទីរសាធារណការ គ្រប់ខេត្ត-ក្រុង ដើម្បីឲ្យពលរដ្ឋស្គាល់មុខ។ ដូច្នេះខេត្តណាមានសំបុកមាន់ប៉ុន្មាន ពលរដ្ឋដឹងឭទាំងអស់គ្នាតាមរយៈ App ។ លោកបន្តថា ប្រធានមន្ទីរសាធារណការខេត្ត ក្រុង គឺលាក់មុខលែងបានហើយ។

ផ្លូវសំបុកមាន់ នៅផ្លូវជាតិលេខ៣ (រូបថតកាលពីខែកក្កដា ឆ្នាំ២០១៨) /រូបថត៖ ក្រសួងសាធារណការ និងដឹកជញ្ជូន

សូមរំឭកថា នាពេលកន្លងមក ដើម្បីជួសជុលផ្លូវសំបុកមាន់ ក្រសួងសាធារណការ និងដឹកជញ្ជូន បានដាក់ចេញយុទ្ធនាការ ជួសជុលផ្លូវខូចនៅទូទាំងប្រទេស ដោយបានចែកម៉ូតូកង់៣ សម្រាប់ធ្វើសកម្មភាពថែទាំផ្លូវ និងលុបសំបុកមាន់នេះ រួមមាន អាវសុវត្ថិភាព មួកសុវត្ថិភាព ស្រោមដៃ ភ្លើង ផ្លាកសញ្ញាមានការដ្ឋាន ផ្លាកសញ្ញាចប់ការដ្ឋាន បង្គោលចរាចរណ៍រាងសាជី សញ្ញាបង្វែរទិស ខ្សែការពារការដ្ឋាន របាការពារការដ្ឋាន ម៉ាស៊ីនភ្លើង ម៉ាស៊ីនបង្ហាប់ ជើងដំរី កៅស៊ូ និង មានមន្រ្តីបញ្ជាចរាចរណ៍ផងដែរ៕

ប្រភព៖ ដើមអម្ពិល ប្រែសម្រួល៖ លាភ.