សម្ដេច ហ៊ុន សែន ប្រតិកម្មនឹងការលើកឡើងរបស់លោក សម រង្ស៊ី រឿងដោះលែងលោក កឹម សុខា

2018-11-07 02:13:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្ដេច ហ៊ុន សែន នាយករដ្ឋមន្រ្តីកម្ពុជា នៅព្រឹកថ្ងៃទី៧ ខែវិច្ឆិកា ឆ្នាំ២០១៨នេះ បានប្រតិកម្មទៅនឹងការលើកឡើងរបស់លោក សម រង្ស៊ី ដែលថា "សម្ដេច ហ៊ុន សែន នឹងដោះលែងលោក កឹម សុខា នៅថ្ងៃទី២៩ ខែធ្នូ ២០១៨ ខាងមុខនេះ ក្នុងឱកាសខួបទី២០ នៃនយោបាយឈ្នះៗ"។ សម្ដេច ហ៊ុន សែន បញ្ជាក់ថា "ឲ្យរងចាំមើលទៅ"។

សម្ដេច ហ៊ុន សែន ថ្លែងនៅវិមានសន្ដិភាព នាពេលកន្លងមក

ការបញ្ជាក់របស់សម្ដេច ហ៊ុន សែន ដូច្នេះ បានធ្វើឡើងក្នុងពិធីជួបសំណេះសំណាលជាមួយកម្មករ កម្មការិនីប្រមាណ ២៣៤៦៦នាក់ មកពីរោងចក្រ សហគ្រាសចំនួន២០ នៅក្នុងខេត្តតាកែវ។

សម្ដេច ហ៊ុន សែន បញ្ជាក់ថា លោក កឹម សុខា ពុំទាន់ត្រូវបានតុលាការផ្ដន្ទាទោស និងមានទោស ដែលអាចឲ្យសម្ដេចនាយករដ្ឋមន្រ្តីទូលថ្វាយព្រះមហាក្សត្រ ដើម្បីលើកលែងទោសនោះទេ។

សូមបញ្ជាក់ថា កាលពីថ្ងៃទី៦ ខែវិច្ឆិកា ឆ្នាំ២០១៨ ម្សិលមិញ លោក សម រង្ស៊ី បានបង្ហោះលើហ្វេសប៊ុករបស់លោកថា "សម្ដេច ហ៊ុន សែន នឹងដោះលែងលោក កឹម សុខា នៅថ្ងៃ២៩ ធ្នូ ២០១៨ នេះ ក្នុងឱកាសខួបទី ២០ នៃ "នយោបាយឈ្នះៗ" ដែលសម្ដេច ហ៊ុន សែន តែងតែយកមកអួតអាង។ តាមការពិត ការដោះលែងលោក កឹម សុខា នេះ គឺធ្វើឡើងក្រោមសម្ពាធអន្តរជាតិសុទ្ធសាធ ហើយជាជំហានទី១ ដើម្បីចៀសវាងទណ្ឌកម្មពាណិជ្ជកម្មពីសហភាពអឺរ៉ុប"៕

អត្ថបទ៖ វាសនា