កម្ពុជាត្រៀមរៀបចំ "ទិវាបុណ្យឯករាជ្យជាតិ ៩ វិច្ឆិកា" ធំជាងមុន

2018-11-07 08:36:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធររំពឹងថា ព្រះរាជពិធីបុណ្យឯករាជ្យជាតិ ខួបលើកទី៦៥ នាថ្ងៃទី៩វិច្ឆិកា ២០១៨ខាងមុខនេះ អាចនឹងមានអ្នកចូលរួមជាង២ម៉ឺននាក់ ហើយនឹងមានការរៀបចំធំជាងឆ្នាំរាល់ដង ដោយមានកម្លាំងមហាជន កម្លាំងសមត្ថកិច្ចចម្រុះ មកពីក្រសួង ស្ថាប័ននានា និង មានពិធីព្យុះហយាត្រា ពីអង្គភាពពាក់ព័ន្ធនីមួយៗចូលរួមផងដែរ។ អាជ្ញាធរ បានបញ្ជាក់ថា នឹងត្រៀមកម្លាំងការពារសន្តិសុខ សណ្តាប់ធ្នាប់ឱ្យបានល្អជូនប្រជាពលរដ្ឋ ក្នុងទិវានេះ។

ទោះជាយ៉ាងណា មិនខុសពីរាល់ឆ្នាំនោះទេ ពោលគឺកម្ពុជានឹងរៀបចំទិវាបុណ្យឯករាជ្យជាតិ នៅវិមានឯករាជ្យ ក្រោមព្រះរាជាធិបតីភាពព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី សម្តេចនាយករដ្ឋមន្ត្រី ហ៊ុន សែន សម្តេច ហេង សំរិន ប្រធានរដ្ឋសភា មន្ត្រីរាជការ សិស្សានុសិស្ស កងទ័ព និង មហាជនជាច្រើននាក់។

ព្រះមហាក្សត្រ ក្នុងទិវាបុណ្យឯករាជ្យជាតិ កាលពីថ្ងៃទី៩វិច្ឆិកា ២០១៧ នៅវិមានឯករាជ្យ រាជធានីភ្នំពេញ

បើតាមលោក ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស បានគូសបញ្ជាក់ថា ព្រះរាជពិធីបុណ្យឯករាជ្យជាតិ ខួបលើកទី៦៥ នាថ្ងៃទី៩វិច្ឆិកា ២០១៨ខាងមុខនេះ នឹងត្រូវធ្វើឡើងខុសពីបណ្តាឆ្នាំមុនៗ។ ខុសដោយឆ្នាំនេះ មានព្រឹត្តិការណ៍ធំពីរ គឺពិធីថ្វាយទៀនជ័យ នៅវិមានឯករាជ្យ និង មិទ្ទិញមហាជន នៅមុខព្រះបរមរាជវាំង។

លោកបន្តថា អាជ្ញាធរបានយកចិត្តទុកដាក់បន្ថែមចំនួនបីចំណុចគឺ ទី១. នៅវិមានឯករាជ្យ ទី២. នៅព្រះបរមរាជវាំង និងទី៣. នៅតាមដងផ្លូវ។ ជាមួយគ្នានេះ លោកក៏បានស្នើឱ្យប្រជាពលរដ្ឋមានការយោគយល់ផងដែរចំពោះការបិទផ្លូវរបស់សមត្ថកិច្ច។

សូមជម្រាបថា ទិវាបុណ្យឯករាជ្យជាតិ ៩ វិច្ឆិកា ត្រូវបានធ្វើឡើងដើម្បីរំលឹកនូវថ្ងៃដែលកម្ពុជារំដោះខ្លួនបានចេញពីនឹមអាណានិគមនិយមបារាំង ក្នុងឆ្នាំ១៩៥៣ ក្រោមព្រះរាជបូជនីយកិច្ចដឹកនាំរបស់អតីតព្រះមហាវីរក្សត្រ ព្រះបរមរតនកោដ្ឋ៕