អាស៊ាន-ចិន ឯកភាពគ្នាលើ "ចក្ខុវិស័យភាពជាដៃគូយុទ្ធសាស្រ្ត ឆ្នាំ២០៣០"

2018-11-14 07:45:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងកិច្ចប្រជុំកំពូលអាស៊ាន-ចិន លើកទី២១ នៅប្រទេសសិង្ហបុរី នៅថ្ងៃទី១៤ ខែវិច្ឆិកា ២០១៨នេះ អង្គប្រជុំបានឯកភាពគ្នាក្នុងការចេញសេចក្តីប្រកាសព័ត៌មានរួមរបស់ប្រធានកិច្ចប្រជុំអាស៊ាន-ចិន លើកទី២១ ចក្ខុវិស័យភាពជាដៃគូយុទ្ធសាស្រ្តអាស៊ាន-ចិន ឆ្នាំ២០៣០ សេចក្តីប្រកាសរួមស្តីពីកិច្ចសហប្រតិបត្តិការផ្នែកវិទ្យាសាស្រ្ត បច្ចេកទេស និងនវានុវត្តន៍អាស៊ាន-ចិន និង របាយការណ៍វឌ្ឍនភាពស្តីពីការអនុវត្តផែនការសកម្មភាព២០១៦-២០២០។ នេះបើតាមការបញ្ជាក់តាមហ្វេសប៊ុកផេកសម្ដេច ហ៊ុន សែន នៅថ្ងៃទី១៤ ខែវិច្ឆិកា ២០១៨នេះ។

មេដឹកនាំអាស៊ាន-ចិន ថតរូបជាមួយគ្នា អំឡុងកិច្ចប្រជុំកំពូលអាស៊ាន នៅប្រទេសសិង្ហបុរី/ រូបភាព៖ ហ្វេសប៊ុកផេកសម្ដេច ហ៊ុន សែន

កិច្ចប្រជុំកំពូលអាស៊ាន-ចិនលើកទី២១ បានប្រព្រឹត្តទៅក្រោមប្រធានបទ "ការពិនិត្យឡើងវិញនូវកិច្ចសហប្រតិបត្តិការអាស៊ាន-ចិន និងទិសដៅអនាគត"។ នៅក្នុងឱកាសនៃខួបលើកទី១៥ នៃភាពជាដៃគូយុទ្ធសាស្រ្តអាស៊ាន-ចិន មេដឹកនាំអាស៊ានបានវាយតម្លៃខ្ពស់ចំពោះសមិទ្ធផលផ្លែផ្កាជាច្រើន ដែលបានកើតចេញពីកិច្ចសហប្រតិបត្តិការអាស៊ាន-ចិន ដែលបាននឹងកំពុងចូលរួមចំណែកក្នុងបុព្វហេតុស្ថិរភាព សន្តិសុខ សេដ្ឋកិច្ច ពាណិជ្ជកម្ម វិនិយោគ ការតភ្ជាប់ ចំណងការទូត និងទំនាក់ទំនងរវាងប្រជាជន និងប្រជាជន។

ចំណែកសារព័ត៌មានចិន CGTN ក៏បានចេញផ្សាយនៅថ្ងៃទី១៤ ខែវិច្ឆិកា ២០១៨នេះថា "លោក លី សៀនឡុង នាយករដ្ឋមន្រ្តីសិង្ហបុរីថ្លែងក្នុងអង្គប្រជុំថា ចិន និងអាស៊ានរំពឹងថា នឹងអនុម័ត " ចក្ខុវិស័យភាពជាដៃគូយុទ្ធសាស្រ្តអាស៊ាន-ចិន ឆ្នាំ២០៣០" ដែលជាឯកសារយុទ្ធសាស្រ្តទម្រង់ទិសនៃកិច្ចសហប្រតិបត្តិការទ្វេភាគី៕

អត្ថបទ៖ វាសនា