ទស្សនកិច្ចរបស់ ពូទីន នៅសិង្ហបុរី ស្រូបបានគម្រោងវិនិយោគជាង ១ពាន់លានដុល្លារ

2018-11-15 07:39:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មូលនិធិវិនិយោគផ្ទាល់របស់រុស្ស៊ី (RDIF) បានចុះកិច្ចព្រមព្រៀងជាមួយក្រុមហ៊ុនសិង្ហបុរីលើគម្រោងវិនិយោគនៅក្នុងប្រទេសរុស្ស៊ី ក្នុងទំហំទឹកប្រាក់សរុបប្រមាណជាង ១ពាន់លានដុល្លារ។ កិច្ចព្រមព្រៀងនេះ បានធ្វើឡើងអំឡុងលោក វ៉្លាឌីមៀ ពូទីន ប្រធានាធិបតីរុស្ស៊ី ធ្វើទស្សនកិច្ច និងចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅក្នុងប្រទេសសិង្ហបុរី នាសប្ដាហ៍នេះ។

លោក វ៉្លាឌីមៀ ពូទីន ប្រធានាធិបតីរុស្ស៊ី (ឆ្វេង) ចាប់ដៃជាមួយលោក លី សៀនឡុង នាយករដ្ឋមន្រ្តីសិង្ហបុរី (ស្ដាំ) នៅក្នុងប្រទេសសិង្ហបុរី/ រូបភាព៖ ហ្វេសប៊ុកប្រធានាធិបតីរុស្ស៊ី

ក្នុងនោះ ក្រុមហ៊ុនសិង្ហបុរី Indorama Corporation និង JSC Yadran-Oil បានឯកភាពគ្នាចូលរួមក្នុងគម្រោងវិនិយោគនានាក្នុងប្រទេសរុស្ស៊ី។ ក្រុមហ៊ុនសិង្ហបុរី Makara Capital បានយល់ព្រមវិនិយោគលើគម្រោងនវានុវត្តន៍ ចំនួន ២០០លានដុល្លារ។ ក្រុមហ៊ុនសិង្ហបុរី Asian AmericanMedical Group បានយល់ព្រមវិនិយោគបង្កើតមជ្ឈមណ្ឌលវិជ្ជសាស្រ្តនុយក្លេអ៊ែរ នៅក្នុងប្រទេសរុស្ស៊ី។

លោក Kirill Dmitriev ប្រធានមូលនិធិវិនិយោគផ្ទាល់របស់រុស្ស៊ីបានបញ្ជាក់ថា ការវិនិយោគរបស់សិង្ហបុរីនៅក្នុងប្រទេសរុស្ស៊ី មានទំហំទឹកប្រាក់សរុបចំនួនប្រមាណ ១៧ពាន់លានដុល្លារ។ សិង្ហបុរីត្រូវបានរុស្ស៊ីចាត់ទុកជាប្រទេសដ៏សំខាន់មួយ សម្រាប់សក្ដានុពលវិនិយោគ ហើយត្រូវបានរុស្ស៊ីជំរុញបន្ថែមទៀត ទាំងរដ្ឋាភិបាល និងវិស័យឯកជនសិង្ហបុរី ឲ្យវិនិយោគនៅក្នុងប្រទេសរុស្ស៊ី។

សូមបញ្ជាក់ថា នេះជាលើកទី១ ដែលលោក ពូទីន ធ្វើទស្សនកិច្ចនៅក្នុងប្រទេសសិង្ហបុរី៕