នួន ជា និង ខៀវ សំផន ត្រូវបានផ្តន្ទាទោសដាក់ពន្ធនាគារអស់មួយជីវិត

2018-11-16 06:14:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គជំនុំជម្រះសាលាដំបូងនៃអង្គជំនុំជម្រុះវិសាមញ្ញក្នុងតុលាការកម្ពុជា (អ.វ.ត.ក) នៅថ្ងៃទី១៦ ខែវិច្ឆិកា ឆ្នាំ២០១៨នេះ បានសម្រេចផ្តន្ទាទោសលោក នួន ជា និងលោក ខៀវ សំផន អតីតមេដឹកនាំខ្មែរក្រហម ដាក់ពន្ធនាគារអស់មួយជីវិត ក្នុងសំណុំរឿង ០០២/០២។

ក្នុងសំណុំរឿង ០០២/០២នេះ អង្គជំនុំជម្រះ បានចោទ នួន ជា និង ខៀវ សំផន ថាបានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ អំពើប្រល័យពូជសាសន៍ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ពាក់ព័ន្ធទៅនឹងទីតាំងឧក្រិដ្ឋកម្ម និងការចោទប្រកាន់លើអង្គហេតុដូចតទៅ៖

-ការដ្ឋានការងារ និងសហករណ៍ (សហករណ៍ត្រាំកក់ ការដ្ឋានទំនប់ត្រពាំងថ្ម ការដ្ឋានទំនប់១មករា និងការដ្ឋានសាងសង់ព្រលានយន្តហោះកំពង់ឆ្នាំង)

-មន្ទីរសន្តិសុខ និងទីតាំងសម្លាប់មនុស្ស (មន្ទីរ ស-២១ មន្ទីរសន្តិសុខក្រាំងតាចាន់ មន្ទីរសន្តិសុខអូរកន្សែង និងមន្ទីរសន្តិសុខភ្នំក្រោល)

-អំពើប្រល័យពូជសាសន៍ទៅលើប្រជាជនចាម និងវៀតណាម

-ការប្រព្រឹត្តចំពោះពុទ្ធសាសនិកជន និងអតីតមន្រ្តីរដ្ឋការនៃរបបសាធារណរដ្ឋខ្មែរ

-និងការរៀបអាពាហ៍ពិពាហ៍ដោយបង្ខំនៅទូទាំងប្រទេស។

គួររំលឹកថា កាលពីថ្ងៃទី០៧ ខែសីហា ឆ្នាំ២០១៤ សាលាក្តីខ្មែរក្រហម ក៏បានផ្តន្ទាទោស នួន ជា ដែលជាអនុលេខាបក្សកុម្មុយនីស្តកម្ពុជា និង ខៀវ សំផន ប្រមុខរដ្ឋនៃរបបកម្ពុជាប្រជាធិបតេយ្យ ដាក់ពន្ធនាគារអស់មួយជីវិតផងដែរ នៅក្នុងសំណុំរឿង ០០២/០១ ចំពោះបទឧក្រិដ្ឋប្រឆាំងមនុស្សជាតិ៕

អត្ថបទ៖ សំភី