ប្រធានាធិបតីតៃវ៉ាន់ លាលែងពីប្រធានបក្ស ក្រោយបរាជ័យក្នុងការបោះឆ្នោតថ្នាក់តំបន់

2018-11-25 03:14:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីតៃវ៉ាន់ លោកស្រី Tsai Ing-wen បានប្រកាសចុះចេញពីប្រធានគណបក្សវឌ្ឍនភាពប្រជាធិបតេយ្យ (DPP) បន្ទាប់ពីគណបក្សនេះ រងការបរាជ័យយ៉ាងធ្ងន់ធ្ងរ នៅក្នុងការបោះឆ្នោតថ្នាក់តំបន់ កាលពីថ្ងៃទី២៤ ខែវិច្ឆិកា ឆ្នាំ២០១៨។

ថ្លែងនៅក្នុងទីស្នាក់ការគណបក្ស លោកស្រី Tsai បានសុំទោសអ្នកគាំទ្រទាំងអស់ ចំពោះការបរាជ័យនេះ និងធានាទទួលខុសត្រូវ ចំពោះលទ្ធផលបោះឆ្នោតនេះ ដោយលោកស្រីលើកឡើងថា «ការខិតខំរបស់យើង នៅមិនទាន់គ្រប់គ្រាន់នៅឡើយទេ»។

លោកស្រី Tsai Ing-wen ថ្លែងក្នុងសន្និសីទសារព័ត៌មានមួយនៅក្រុងតៃប៉ិ កាលពីឆ្នាំ២០១៥ (រូបថត៖ Reuters)

ទោះបីជាលោកស្រី លាលែងពីប្រមុខបក្ស ប៉ុន្តែលោកស្រីមិនលាលែងពីតំណែងប្រធានាធិបតីឡើយ ពោលគឺលោកស្រីនៅតែបន្តកាន់តំណែងនេះ រហូតដល់ការបោះឆ្នោតអាណត្តិក្រោយ ដែលគ្រោងនឹងធ្វើឡើងនៅខែមករា ឆ្នាំ២០២០។ ការប្រកាសមិនលាលែងពីតំណែងប្រធានាធិបតីនេះ គឺឆ្លើយតបទៅនឹងសំណើរបស់លោកនាយករដ្ឋមន្រ្តីតៃវ៉ាន់ William Lai ជុំវិញលទ្ធផលបោះឆ្នោតនេះ ដោយលោកលើកឡើងថា «**នេះជាទំនួលខុសត្រូវនយោបាយរបស់លោកស្រី Tsai**»។

គណបក្ស DPP បានចាញ់ឆ្នោតនៅក្រុង Kaohsiung ជាលើកដំបូង បន្ទាប់ពី DPP បានកាន់កាប់អំណាចនៅក្រុងនេះ ជាង ២០ឆ្នាំកន្លងមក ទៅគណបក្សជាតិនិយមគូមីងតាង។ DPP ក៏បានចាញ់ឆ្នោតនៅក្រុង Taichung ដែលជាក្រុងលំដាប់ទី២ផងដែរ។ យ៉ាងណាក៏ដោយ គណបក្ស DPP ក៏នៅតែឈ្នះឆ្នោតនៅតំបន់ធំ២ទៀតផងដែរ គឺក្រុង Tainan ស្ថិតនៅភាគខាងត្បូង និងក្រុង Taoyuan នៅភាគខាងជើង៕

ប្រភព៖ Channelnewsasia ប្រែសម្រួល៖ សំភី