រដ្ឋបាលរាជធានី បារម្ភពីសុវត្ថិភាពយន្តហោះ ដោយការបង្ហោះដ្រូនក្បែរអាកាសយានដ្ឋាន

2018-11-26 09:21:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលរាជធានីភ្នំពេញ នៅថ្ងៃទី២៦ ខែវិច្ឆិកា ឆ្នាំ២០១៨នេះ បានចេញសេចក្ដីជូនដំណឹង ពីការហាមឃាត់ការប្រើប្រាស់ម៉ាស៊ីនថតរូប និងវីដេអូបំពាក់លើដ្រូន ក្នុងរាជធានីភ្នំពេញ ជាពិសេសផ្លូវហោះហើររបស់យន្តហោះ។

យន្តហោះរបស់ក្រុមហ៊ុនអាកាសចរណ៍ Malaysia Airline ចុះចតនៅព្រលានយន្តហោះអន្តរជាតិភ្នំពេញ

សេចក្ដីជូនដំណឹងនេះ គឺដោយសារការព្រួយបារម្ភ បន្ទាប់ពីរដ្ឋបាលរាជធានីរកឃើញ បុគ្គលមួយចំនួនតូច បានបង្ហោះម៉ាស៊ីនថតរូប និងវីដេអូបំពាក់លើដ្រូន ដើម្បីជាល្បែងកម្សាន្ត ពុំមានការអនុញ្ញាតត្រឹមត្រូវ ពុំដឹងផលប៉ះពាល់លើផ្នែកសន្តិសុខនិងសុវត្ថិភាព ជាពិសេស បង្ហោះនៅក្នុងតំបន់ហាមឃាត់ជុំវិញព្រលានយន្តហោះអន្តរជាតិភ្នំពេញ និងចំផ្លូវហោះហើររបស់យន្តហោះ ដែលអាចបង្កគ្រោះថ្នាក់ជាយថាហេតុ។

រដ្ឋបាលរាជធានី ស្នើឲ្យប្រជាពលរដ្ឋរស់នៅជុំវិញព្រលានយន្តហោះចូលរួមអនុវត្តសេចក្ដីជូនដំណឹងនេះ។ ហើយក្នុងករណីចាំបាច់ត្រូវការប្រើប្រាស់ ប្រជាពលរដ្ឋត្រូវសុំការអនុញ្ញាតពី រដ្ឋបាលរាជធានីភ្នំពេញ និងរដ្ឋលេខាធិការដ្ឋានអាកាសចរណ៍ស៊ីវិល។

ព្រលានយន្តហោះអន្តរជាតិភ្នំពេញ

រដ្ឋបាលរាជធានីបន្តថា ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ និងគណៈបញ្ជាការឯកភាពរដ្ឋបាលខណ្ឌទាំង១២ នឹងចាត់វិធានការចំពោះការបង្ហោះម៉ាស៊ីនថតរូប និងវីដេអូបំពាក់លើដ្រូន ក្នុងរាជធានីភ្នំពេញ ពិសេសតំបន់ជុំវិញផ្លូវហោះហើររបស់យន្តហោះដោយគ្មានច្បាប់អនុញ្ញាត៕