រាជរដ្ឋាភិបាល មិនឱ្យមានការរើសអើង ខណៈពលរដ្ឋមួយចំនួន កំពុងមានកង្វល់ចំពោះជនជាតិចិន

2018-11-28 02:29:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកនាំពាក្យរាជរដ្ឋាភិបាលកម្ពុជា បានចេញសេចក្តីថ្លែងការណ៍មួយកាលពីថ្ងៃទី២៧ ខែវិច្ឆិកា ឆ្នាំ២០១៨ ដោយបញ្ជាក់ថា រាជរដ្ឋាភិបាលមានគោលនយោបាយច្បាស់លាស់ ដោយមិនអនុញ្ញាតឱ្យមានសកម្មភាពទាំងឡាយណា ដែលមានចរិតរើសអើងពូជសាសន៍ កើតមាននៅក្នុងប្រទេសកម្ពុជាឡើយ។

បើតាមអ្នកនាំពាក្យដដែល ការចេញសេចក្តីថ្លែងការណ៍នេះ គឺក្នុងពេលដែលពលរដ្ឋខ្មែរមួយចំនួន បានបង្ហាញអារម្មណ៍របស់ខ្លួនតាមបណ្តាញសង្គមចំពោះហេតុការណ៍ ដែលបានកើតឡើងនៅខេត្តព្រះសីហនុនាពេលថ្មីៗនេះ ដោយមានការសង្ស័យថា ពាក់ព័ន្ធទៅនឹងជនជាតិចិន ហើយទន្ទឹមនឹងនេះ ក៏មានសារព័ត៌មានមួយចំនួន បានធ្វើបទអត្ថាធិប្បាយ ក្នុងគោលដៅដើម្បីផលប្រយោជន៍ណាមួយនោះផងដែរ។

លោក ផៃ ស៊ីផាន អ្នកនាំាពាក្យរាជរដ្ឋាភិបាលកម្ពុជា ថ្លែងនាពេលកន្លងមក

ក្នុងសេចក្តីថ្លែងការណ៍នេះបញ្ជាក់ថា រាជរដ្ឋាភិបាល បាននឹងកំពុងចាត់វិធានការយ៉ាងម៉ឺងម៉ាត់ ក្នុងការពង្រឹងសន្តិសុខ សុវត្ថិភាព ក៏ដូចជាសណ្តាប់ធ្នាប់សង្គម សម្រាប់បម្រើផលប្រយោជន៍សាធារណៈ នៅក្នុងតំបន់នោះ។ ក្នុងនោះក៏មានជនបរទេសដែលជាអ្នកទេសចរ ត្រូវបានឃាត់ខ្លួនជាបន្តបន្ទាប់ និងបញ្ជូនត្រឡប់ទៅប្រទេសដើមវិញ ក្រោមការអនុវត្តច្បាប់នៃព្រះរាជាណាចក្រកម្ពុជា។

ជាមួយគ្នានេះ រាជរដ្ឋាភិបាល នៅតែបន្តលើកទឹកចិត្តដល់វិនិយោគិនទាំងអស់ ដែលបាននឹងកំពុងប្រតិបត្តិ ធុរកិច្ចក៏ដូចជាភ្ញៀវជាតិ និងអន្តរជាតិ ដែលមកទស្សនាកម្សាន្ត រមណីយដ្ឋានធម្មជាតិ វប្បធម៌ និងប្រវត្តិសាស្រ្តនៅកម្ពុជា។

សេចក្តីថ្លែងការណ៍ដដែលបន្ថែមថា ក្នុងបរិកាណ៍នេះ រាជរដ្ឋាភិបាល សង្ឃឹមយ៉ាងមុតមាំថា អាជ្ញាធរដែនដីគ្រប់លំដាប់ថ្នាក់ ត្រូវបន្តអនុវត្តច្បាប់ដែលស្របទៅនឹងគោលនយោបាយជាតិដាក់ចេញដោយសម្តេច ហ៊ុន សែន ចំពោះវិស័យទេសចរណ៍ និងការវិនិយោគ៕

អត្ថបទ៖ សំភី