កម្ពុជា នឹងបើកស្ថានទូតនៅនេប៉ាល់

2018-11-30 01:40:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានជម្រាបជូននាយករដ្ឋមន្រ្តីនេប៉ាល់ លោក ខាត់ ហ្គា ប្រាសាទ ស្សាម៉ា អូលី ថាកម្ពុជានឹងបើកស្ថានទូតនៅទីក្រុងកដ្ឋមណ្ឌូ ប្រទេសនេប៉ាល់ ហើយប្រទេសនេប៉ាល់ អាចបើកស្ថានទួតនៅរាជធានីភ្នំពេញផងដែរ។ ការលើកឡើងនេះក្នុងជំនួបរវាងនាយករដ្ឋមន្រ្តីទាំង២ កាលពីថ្ងៃទី២៩ ខែវិច្ឆិកា ឆ្នាំ២០១៨ ក្នុងអំឡុងដំណើរទស្សនកិច្ចរបស់សម្តេច ហ៊ុន សែន នៅប្រទេសនេប៉ាល់។

នៅក្នុងជំនួបនេះ លោកនាយករដ្ឋមន្ត្រីនេប៉ាល់បានមានប្រសាសន៍ថា នេះគឺជាដំណើរទស្សនកិច្ចជាលើកដំបូងរបស់នាយករដ្ឋមន្ត្រីកម្ពុជា ទៅកាន់ប្រទេសនេប៉ាល់។ លោកបានចាត់ទុកថា ដំណើរទស្សនកិច្ចនេះ ពិតជាមានសារៈសំខាន់នៅក្នុងប្រវត្តិសាស្ត្រ ហើយលោកបានចាត់ទុកថា ទំនាក់ទំនងទ្វេភាគីរវាងប្រទេសនេប៉ាល់ និងប្រទេសកម្ពុជា គឺមានលក្ខណៈស្និទ្ធិស្នាល និងជាលក្ខណៈមិត្តភាព ដោយប្រទេសទាំងពីរ បានចាប់ផ្ដើមមានទំនាក់ទំនងជាមួយគ្នាតាំងពីឆ្នាំ១៩៧៥មកម្លេះ។

នាយករដ្ឋមន្រ្តីកម្ពុជា-នេប៉ាល់ អញ្ជើញធ្វើជាអធិបតីចុះហត្ថលេខាលើឯកសារសំខាន់ៗចំនួន៤ ក្រោយជំនួបពិភាក្សា។ រូបថត៖ ហ្វេសប៊ុកសម្តេច ហ៊ុន សែន

ជាការឆ្លើយតប សម្តេច ហ៊ុន សែន ក៏បានអរគុណលោកនាយករដ្ឋមន្ត្រីនេប៉ាល់វិញផងដែរចំពោះការអញ្ជើញនេះ និងអរគុណកាលពីជំនួបជាមួយគ្នាក្នុងខែកញ្ញា ២០១៨ នៅទីក្រុងញូវយ៉ក ក្នុងមហាសន្និបាតអង្គការសហប្រជាជាតិ។ ជាមួយគ្នានេះ សម្ដេចក៏បានមានប្រសាសន៍ថា ជំនួបទ្វេភាគីនេះ គឺចាត់ទុកថា ជាការអបអរខួបលើកទី៥៥ នៃទំនាក់ទំនងទ្វេភាគីរវាងប្រទេសទាំង២ នៅឆ្នាំ២០១៩ខាងមុខនេះផងដែរ។

សូមបញ្ជាក់ថា ក្រោយជំនួបខាងលើនេះ នាយករដ្ឋមន្ត្រីទាំង២ ក៏បានអញ្ជើញធ្វើជាអធិបតីភាពក្នុងពិធីចុះហត្ថលេខាលើឯកសារសំខាន់ដូចជា៖ ការលើកលែងទិដ្ឋាការ (វីសា) សម្រាប់លិខិតឆ្លងដែនការទូត និងផ្លូវការ, កិច្ចព្រមព្រៀងពាក់ព័ន្ធវិស័យដឹកជញ្ជូនតាមផ្លូវអាកាស និងអនុស្សារណៈយោគយល់គ្នារវាងក្រសួងការបរទេសទាំងពីរ, កិច្ចសហប្រតិបត្តិការលើវិស័យនយោបាយ សេដ្ឋកិច្ច និងវប្បធម៌៕

អត្ថបទ៖ សំភី