កម្ពុជា-វៀតណាម ប្តេជ្ញាដោះស្រាយដើម្បីឈានដល់ការបោះបង្គោលព្រំដែន នៅតំបន់ដែលមិនទាន់ឯកភាព

2018-11-30 02:41:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា និងវៀតណាម បានប្តេជ្ញាថានឹងខិតខំដោះស្រាយការងាររាំងស្ទះនានា ដើម្បីឈានទៅសម្រេចការបោះបង្គោលព្រំដែនរវាងប្រទេសទាំង២ឱ្យបានរួចរាល់ នៅតំបន់ដែលមិនទាន់មានការឯកភាពគ្នា។ ការប្តេជ្ញានេះ ធ្វើឡើងក្នុងជំនួបរវាងលោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ និងលោក ផាម បិញមិញ រដ្ឋមន្រ្តីការបរទេសវៀតណាម ក្នុងអំឡុងទស្សនកិច្ចរបស់លោក ប្រាក់ សុខុន នៅវៀតណាម ពីថ្ងៃទី២៦ ដល់ ២៧ ខែវិច្ឆិកា ឆ្នាំ២០១៨។

លោក ប្រាក់ សុខុន ក្នុងជំនួបជាមួយលោក ផាម បិញមិញ នៅក្រុងហាណូយ ប្រទេសវៀតណាម កាលពីថ្ងៃទី២៧ ខែវិច្ឆិកា ឆ្នាំ២០១៨។ រូបថត៖ ក្រសួងការបរទេសកម្ពុជា

យោងតាមសេចក្តីប្រកាសព័ត៌មានរបស់ក្រសួងការបរទេសកាលពីថ្ងៃទី២៩វិច្ឆិកា បានឱ្យដឹងថា ក្នុងជំនួបនេះ រដ្ឋមន្រ្តីការបរទេសទាំង២ បានវាយតម្លៃខ្ពស់ចំពោះគណៈកម្មការចម្រុះខ័ណ្ឌសីមាព្រំដែនគោក និងការបោះបង្គោលព្រំដែន បានចំនួនប្រមាណ ៨៤ភាគរយហើយ។ ដោយឡែកការងារសេសសល់ ១៦ភាគរយទៀត គឺជាតំបន់ព្រំដែនដែលមិនទាន់មានការឯកភាពគ្នា។

សូមជម្រាបថា កម្ពុជា និងវៀតណាម មានព្រំដែនគោករួមគ្នាប្រវែង១២៧០គីឡូម៉ែត ដែលត្រូវបោះបង្គោល ចំនួន៣១៤បង្គោល កាត់តាមខេត្តចំនួន៩ របស់កម្ពុជា។

បើតាមការបង្ហោះនៅលើហ្វេសប៊ុករបស់លោកស្រី កុយ ពិសី អនុប្រធានលេខាធិការដ្ឋាននៃអាជ្ញាធរជាតិទទួលបន្ទុកកិច្ចការព្រំដែន កាលពីថ្ងៃទី២៣ ខែវិច្ឆិកា ឆ្នាំ២០១៨ បង្ហាញថា កម្ពុជា-វៀតណាម បានបញ្ចប់ទាំងស្រុងនូវការបោះបង្គោលព្រំដែន ក្នុងខេត្តរតនគិរី និងមណ្ឌលគិរី នៅតំបន់ដែលឯកភាពគ្នា ទោះមានឧបសគ្គច្រើនយ៉ាងណាក៏ដោយ។

ជាមួយគ្នានេះ លោក វ៉ា គីមហុង ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានគណៈកម្មាធិការព្រំដែន បានបញ្ជាក់ប្រាប់វិទ្យុវាយោកាលពីពេលថ្មីៗនេះឱ្យដឹងថា ឧបសគ្គនៅក្នុងដំណើរការបោះបង្គោលព្រំដែនកម្ពុជា-វៀតណាម ភាគច្រើនជាកត្តាធម្មជាតិ និងកត្តាភូមិសាស្ត្រ។ លោកបន្តថា ចំពោះតំបន់ដែលមានភាពចម្រូងចម្រាស់ និងមិនទាន់ឯកភាពគ្នារវាងភាគីទាំង២ គឺនៅមិនទាន់បានបោះបង្គោលព្រំដែននៅឡើយទេ ដោយរង់ចាំជំនួយពីបារាំង៕

អត្ថបទ៖ សំភី