អាមេរិក នឹងលក់មីស៊ីល ៣,៥ពាន់លានដុល្លារឲ្យតួកគី

2018-12-19 03:32:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងការបរទេសអាមេរិកបានឯកភាពលើការលក់ប្រព័ន្ធការពារមីស៊ីលក្នុងទំហំទឹកប្រាក់ ៣,៥ពាន់លានដុល្លារ ឲ្យទៅតួកគីហើយ។ នេះបើតាមការបញ្ជាក់របស់ក្រសួងការពារជាតិអាមេរិក ក្រោយទទួលបានការជូនដំណឹងពីព្រឹទ្ធសភាអាមេរិក។

ប្រព័ន្ធការពារមីស៊ីល Patriot របស់អាមេរិក

ទីភ្នាក់ងារសហប្រតិបត្តិការសន្ដិសុខនៃក្រសួងការពារជាតិអាមេរិកបានបញ្ជាក់ថា ក្រសួងការបរទេសអាមេរិកបានឯកភាពឲ្យលក់មីស៊ីលប្រភេទ Patriot ចំនួន ៨០គ្រាប់ និងមីស៊ីលផ្សេងទៀតចំនួន ៦០គ្រាប់ ទៅឲ្យរដ្ឋាភិបាលអង់ការ៉ា រួមជាមួយឧបករណ៍ពាក់ព័ន្ធ រួមមានប្រព័ន្ធរ៉ាដា ស្ថានីយគ្រប់គ្រងទំនាក់ទំនង និងស្ថានីយបាញ់មីស៊ីល។

ក្រសួងការពារជាតិអាមេរិក កាលពីដើមឆ្នាំនេះ បានធ្វើការជាមួយសម្ព័ន្ធមិត្តអង្គការណាតូ គឺតួកគី លើការលក់ប្រព័ន្ធការពារមីស៊ីល Raytheon Co Patriot ដើម្បីបញ្ចៀសមិនឲ្យតួកគីទិញប្រព័ន្ធមីស៊ីល S-400 ពីប្រទេសរុស្ស៊ី។

មន្រ្តីអាមេរិក និងអង្គការណាតូបានព្រមានតួកគីជាបន្ដបន្ទាប់ថា ប្រព័ន្ធការពារមីស៊ីលរុស្ស៊ីមិនអាចយកមកបញ្ចូលក្នុងប្រព័ន្ធការពារដែនអាកាសរបស់អង្គការណាតូបាននោះទេ ហើយការទិញប្រព័ន្ធការពារដែនអាកាស S-400 នឹងប៉ះពាល់ដល់ការទិញយន្តហោះចម្បាំង F-35 និងការដាក់ទណ្ឌកម្មពីសំណាក់ក្រុងវ៉ាស៊ីនតោន៕

ប្រភព៖ Channelnewsasia ប្រែសម្រួល៖ វាសនា