អាកាសយានដ្ឋានអន្តរជាតិរបស់កម្ពុជា ជាប់កំណត់ត្រាទទួលបានអ្នកដំណើរ ១០លាននាក់

2018-12-20 02:31:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាកាសយានដ្ឋានអន្តរជាតិទាំង៣របស់កម្ពុជា (ភ្នំពេញ សៀមរាប ព្រះសីហនុ) បានជាប់កំណត់ត្រាខ្ពស់ដំបូងបំផុត ដោយទទួលបានអ្នកដំណើរ ១០លាននាក់ ក្នុងឆ្នាំ២០១៨នេះ។ ពិធីអបអរសាទរនៃការទទួលបានអ្នកដំណើរនេះ ត្រូវបានធ្វើឡើងកាលពីរសៀលថ្ងៃទី១៩ ខែធ្នូ ឆ្នាំ២០១៨ នៅអាកាសយានដ្ឋានអន្តរជាតិខេត្តព្រះសីហនុ ដែលស្ថិតនៅឃុំរាម ស្រុកព្រៃនប់។

លោក វ៉ាន់ ណូរ៉ាក់ អគ្គនាយកអាកាសយានដ្ឋានអន្តរជាតិកម្ពុជា បានថ្លែងក្នុងពិធីនេះថា នេះជាពេលដ៏វិសេសវិសាល ដើម្បីអបអរសាទរនូវសករាជថ្មីភាពជាដៃគូសហការ របស់អាកាសយានដ្ឋានអន្តរជាតិនៅកម្ពុជា ដែលបានបម្រើសេវាកម្មអ្នកដំណើរចំនួន ១០លាននាក់ សម្រាប់អាកាសយានដ្ឋានអន្តរជាតិទាំង៣ ពោលគឺជាកំណត់ត្រាខ្ពស់ដំបូងបំផុត នៃការខិតខំប្រឹងប្រែងរយៈពេល ៥ឆ្នាំចុងក្រោយ។

លោកបានឱ្យដឹងថា កាលពីឆ្នាំ២០១៧ មានអ្នកដំណើរឆ្លងកាត់ ៨លាននាក់ នេះជាជោគជ័យដ៏ធំធេង ដោយសារការតភ្ជាប់ រវាងព្រលានយន្តហោះទាំង៣នៅកម្ពុជា ក្រោមប្រព័ន្ធតែមួយ រួមចំណែកក្នុងការនាំអ្នកដំណើរ កាន់តែច្រើនមកកម្ពុជា។ នៅឆ្នាំ ១៩៩៥ ក្រុមហ៊ុន Cambodia Airports ត្រូវបានផ្តល់ទំនុកចិត្ត ឱ្យអភិវឌ្ឍអាកាសយានដ្ឋានអន្តរជាតិភ្នំពេញ មានអ្នកដំណើរប្រហែល ៥០ម៉ឺននាក់តែប៉ុណ្ណោះ គឺមានតិចជាង ២០ដង បើប្រៀបធៀបនឹងពេលបច្ចុប្បន្ន។

ពិធីអបអរសាទរនៃការទទួលបានអ្នកដំណើរ ១០លាននាក់ ដែលធ្វើឡើងកាលពីថ្ងៃទី១៩ធ្នូ ២០១៨ នៅព្រលានយន្តហោះអន្តរជាតិខេត្តព្រះសីហនុ។ រូបថត៖ AKP

លោកអគ្គនាយកលើកឡើងយ៉ាងដូច្នេះថា៖ «**ការតភ្ជាប់កាន់តែប្រសើរឡើង ហើយកាន់តែជោគជ័យ ដែលយើងបានច្របាច់បញ្ចូលគ្នារវាងអាកាសយានដ្ឋានទាំង៣ ឱ្យក្លាយទៅជាសហគមន៍តែមួយ គឺមានអ្នកដំណើរ ១០លាននាក់ សម្រាប់អាកាសយានដ្ឋានទាំង៣ ដោយទំនាក់ទំនង ដ៏ជិតស្និទ្ធ និងរឹងមាំ រវាងដៃគូពាក់ព័ន្ធរបស់អាកាសយានដ្ឋាននីមួយៗអស់រយៈពេលជាង ២៣ឆ្នាំចុងក្រោយនេះ**»។

«យើងបានសហការបង្កើតស្តង់ដារ ជាពិសេសទំនាក់ទំនងសន្តិសុខ និងសុវត្ថិភាព ក៏ដូចជាការគាំពារបរិស្ថានផងដែរ ជាមួយក្រសួងទេសចរណ៍ ក្នុងការផ្សព្វផ្សាយ ប្រទេសកម្ពុជា ជាគោលដៅសម្រាប់អ្នកដំណើរ។ បច្ចុប្បន្នអាកាសយានដ្ឋានអន្តរជាតិទាំង៣ កំពុងបម្រើសេវាកម្មជាង ៦០ គោលដៅ។ ព្រលានយន្តហោះមិនត្រឹមតែជាស្ថានីយធ្វើដំណើរ និងការមកដល់របស់ភ្ញៀវរាប់ទាំងអ្នករៀបចំប្រព័ន្ធផ្សេងៗនៅ Runways Aprons ផងដែរ»។ លោក វ៉ាន់ ណូរ៉ាក់ បន្ថែម។

ចំណែកលោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានថ្លែងថា ក្នុងចំណោមភ្ញៀវទេសចរលើទីផ្សារទាំង១០ របស់ខេត្តព្រះសីហនុ មានចិន វៀតណាម អង់គ្លេស បារាំង អាមេរិក និងភ្ញៀវតំបន់អាស៊ាន មានការកើនឡើងខ្លាំង ពិសេសភ្ញៀវទេសចរចិន ហើយភ្ញៀវខ្មែរ ក៏មានការកើនឡើងគួរឱ្យកត់សម្គាល់ផងដែរ។

លោកឱ្យដឹងថា ក្នុងរយៈពេល ១១ខែ ឆ្នាំ២០១៨ ភ្ញៀវទេសចរចូលតាមព្រលានយន្តហោះអន្តរជាតិខេត្តព្រះសីហនុ មានជិត ៣០ម៉ឺននាក់៕

ប្រភព៖ AKP ប្រែសម្រួល៖ សំភី