អភិបាលរងខេត្តប៉ៃលិន និងខេត្តបន្ទាយមានជ័យ ជួបគ្រោះថ្នាក់ចរាចរណ៍នៅខេត្តកំពង់ឆ្នាំង
- 2018-12-21 02:04:35
- ចំនួនមតិ 0 | ចំនួនចែករំលែក 0
អភិបាលរងខេត្តប៉ៃលិន និងខេត្តបន្ទាយមានជ័យ ជួបគ្រោះថ្នាក់ចរាចរណ៍នៅខេត្តកំពង់ឆ្នាំង
ចន្លោះមិនឃើញ
មនុស្សម្នាក់បានស្លាប់នៅកន្លែងកើតហេតុ និង២នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍នៅស្រុករលាប្អៀរ ខេត្តកំពង់ឆ្នាំង កាលពីរសៀលថ្ងៃទី២០ ខែធ្នូ។ ជនរងគ្រោះត្រូវបានគេស្គាល់ថាជាអភិបាលរងខេត្តប៉ៃលិន និងអភិបាលរងខេត្តបន្ទាយមានជ័យ។ នេះបើយោងតាមការចុះផ្សាយរបស់វិបសាយអគ្គស្នងការដ្ឋាននគរបាលជាតិ។
យោងតាមរបាយការណ៍របស់សមត្ថកិច្ចខេត្តកំពង់ឆ្នាំង បានឲ្យដឹងថាជនរងគ្រោះទី១ ឈ្មោះ សោម មុន្នីរ័ត្ន អាយុ៥៦ឆ្នាំ ភេទស្រី អភិបាលរងខេត្តប៉ៃលិន (ស្លាប់នៅកន្លែងកើតហេតុ) ទី២ ឈ្មោះ ប៉ុក ណាឌី អាយុ៤៩ឆ្នាំ ភេទស្រី ជាអភិបាលរងខេត្តបន្ទាយមានជ័យ (របួសធ្ងន់) និងទី៣ ឈ្មោះ គីន ណាំចូក ភេទប្រុស អាយុ២៥ឆ្នាំ ជាអ្នកបើកបររថយន្តម៉ាក Lexus GS300 ពណ៌ស ពាក់ស្លាកលេខ ភ្នំពេញ 2T-8971 ទិសដៅពីខេត្តបន្ទាយមានជ័យមកភ្នំពេញ។
យោងតាមរបាយការណ៍បន្តថា មុនពេលកើតហេតុរថយន្តខាងលើបានបើកបរទិសដៅពីខេត្តមករាជធានីភ្នំពេញ ពេលមកដល់កន្លែងកើតហេតុរថយន្តខាងលើបានរេចង្កូតទៅបុករថយន្តមួយគ្រឿងម៉ាកសាំយ៉ុង និងបន្តទៅបុករថយន្តហ៊ីយ៉ាន់ដាយមួយគ្រឿងទៀត។
បច្ចុប្បន្នជនរងគ្រោះត្រូវបានសមត្ថកិច្ចបញ្ជូនទៅសង្គ្រោះបន្ទាន់នៅមន្ទីរពេទ្យខេត្ត ចំណែកសាកសពយកមកដំកល់នៅមន្ទីរពេទ្យបង្អែកខេត្ត។ មធ្យោបាយពាក់ព័ន្ធសមត្ថកិច្ចជំនាញវាស់វែងយកមករក្សាទុកនៅអធិការស្រុកដើម្បីចាត់ការតាមនីតិវិធី៕
រូបភាព៖ អគ្គស្នងការដ្ឋាននគរបាលជាតិ