សម្តេច ហ៊ុន សែន ហៅព័ត៌មានដែលផ្សាយថា «ចាប់លោក គិត ម៉េង» ជាការភូតកុហក និងបាត់តម្លៃ

2018-12-26 03:06:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្លែងក្នុងពិធីសំណេះសំណាលជាមួយកម្មករជាង ១ម៉ឺននាក់នៅខេត្តកណ្តាល នាព្រឹកថ្ងៃទី២៦ ខែធ្នូ ឆ្នាំ២០១៨នេះ សម្តេចនាយករដ្ឋមន្រ្តី ហ៊ុន សែន បានហៅព័ត៌មានដែលផ្សាយថា សម្តេច បានចាប់ខ្លួនលោកឧកញ៉ា គិត ម៉េង នោះ ជាព័ត៌មាន "ឡប់" ភូតកុហក និងបាត់តម្លៃ។

សម្តេច ហ៊ុន សែន ថ្លែងនាពេលកន្លងមក

ការថ្លែងខាងលើនេះ ធ្វើឡើងបន្ទាប់ពីមានការចុះផ្សាយអត្ថបទមួយកាលពីថ្មីៗនេះ ដែលមានចំណងជើងថា៖ «ដំណឹងបន្ទាន់ ហ៊ុន សែន ខឹងខ្លាំងណាស់ ចាប់ខ្លួនឧកញ៉ាគិត ម៉េង មិញៗនេះផ្អើល»។

ចំពោះការលើកឡើងថា សម្តេច ហ៊ុន សែន ឱ្យលុយទៅបុគ្គលិកទូរទស្សន៍ CNC និងបាយ័ន ថាបានលុយមកពីណានោះ សម្តេចអះអាងបញ្ជាក់ថា គឺជាលុយរបស់សម្តេចផ្ទាល់៖ «និយាយឱ្យច្បាស់ លុយអញ! អញធ្វើប៉ុណ្ណឹងដែរ អញអត់លុយ?...»។ សម្តេចបន្តថា ជំនួយឧបត្ថម្ភសម្រាប់បុគ្គលិក ឬមន្រ្តីរាជការ ឬក៏អ្នកដែលជួបការលំបាក គឺតែងតែមានពីនាយករដ្ឋមន្រ្តី និងភរិយារបស់នាយករដ្ឋមន្រ្តី។

សូមរំលឹកថា កាលពីថ្ងៃទី២២ ខែធ្នូ ឆ្នាំ២០១៨កន្លងទៅ ក្រុមហ៊ុនបណ្ដាញផ្សព្វផ្សាយកម្ពុជា ហៅកាត់ថា CBS ដែលគ្រប់គ្រងលើទូរទស្សន៍ CTN, My TV, CNC និង One TV ក៏បានចេញសេចក្ដីបំភ្លឺផងដែរ ជុំវិញការផ្សព្វផ្សាយព័ត៌មានថា លោក គិត ម៉េង ដែលជាអគ្គនាយកក្រុមហ៊ុននេះ ត្រូវសម្តេច ហ៊ុន សែន បញ្ជាឲ្យចាប់ខ្លួន។ ក្រុមហ៊ុននេះ ហៅការផ្សព្វផ្សាយបែបនេះថា មានបំណងទុច្ចរិត បំភ័ន្តមតិសាធារណៈ គ្មានសីលធម៌ និងប្រមាថសេចក្ដីថ្លៃថ្នូររបស់ថ្នាក់ដឹកនាំជាតិ និងលោក គិត ម៉េង៕

អត្ថបទ៖ សំភី