ថៃ ចែកចាយ Wifi ឥតគិតថ្លៃ ក្នុងតំបន់ដាច់ស្រយាលទូទាំងប្រទេស

2018-12-26 06:47:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថៃ នឹងផ្ដល់អ៊ីនធឺណិត WiFi ដោយឥតគិតថ្លៃ រយៈពេល ៣ឆ្នាំ ជូនដល់ប្រជាជនដែលមានចំណូលទាបគ្មានលទ្ធភាពប្រើអ៊ីនធឺណិត នៅក្នុងតំបន់ដាច់ស្រយាលនានា ក្រោមគម្រោងរបស់គណៈកម្មការផ្សព្វផ្សាយជាតិ និងទូរគមនាគមន៍ថៃ (NBTC) ។ នេះបើយោងតាមការបញ្ជាក់ពីអគ្គលេខាធិការ NBTC កាលពីថ្ងៃទី២៥ ខែធ្នូ ឆ្នាំ២០១៨។

លោក Takorn Tantasith អគ្គលេខាធិការគណៈកម្មការ NBTC បានប្រាប់ឲ្យដឹងថា ការផ្ដល់ WiFi ឥតគិតថ្លៃនេះ ជាគម្រោងដែលគេស្គាល់ថា Universal Service Obligation (USO) ក្នុងគោលបំណងចែកចាយជូនប្រជាជនថៃ ៦,៣លាននាក់ ឬ ស្មើនឹងផ្ទះ ២,១លានខ្នង ឬស្មើនឹងភូមិចំនួន ៣៩២០ភូមិដែលស្ថិតនៅតំបន់ដាច់ស្រយាល ដើម្បីទទួលបានអ៊ីនធឺណិត ប្រើប្រាស់នៅឆ្នាំ២០១៩។

លោកបន្តថា ចាប់ពីឆ្នាំ២០១៩ ដល់ ២០២៤ គេនឹងដំឡើង WiFi នៅទីតាំងសាធារណៈចំនួន ៥២២៩ កន្លែង ដោយឥតគិតថ្លៃ។ បន្ថែមពីនេះ សាលារៀនចំនួន ១២១០ កន្លែង និងមន្ទីរពេទ្យក្នុងឃុំចំនួន ១០៧ កន្លែង នឹងទទួលបានអ៊ីនធឺណិតផងដែរ។

លោកបន្ថែមថា មជ្ឈមណ្ឌលចែកចាយអ៊ឺនធឺណិតរបស់គម្រោង USO ខាងលើ សរុបចំនួន ៧៦៣ កន្លែង ក៏នឹងត្រូវសាងសង់ផងដែរ។ មជ្ឈមណ្ឌលនីមួយៗ នឹងត្រូវបំពាក់កុំព្យូទ័រចំនួន ១២គ្រឿង និងមានអ្នកជំនាញប្រចាំការ ចាំផ្ដល់សេវាកម្មជូនអ្នកប្រើប្រាស់។

អគ្គលេខាធិការគណៈកម្មការ NBTC ឲ្យដឹងទៀតថា ដោយសារតែប្រជាជនថៃមួយចំនួន មិនមានលទ្ធភាពចំណាយលើថ្លៃអ៊ីនធឺណិត ដូច្នេះ NBTC នឹងផ្ដល់ជូនអ៊ឺនធឺណិត ល្បឿន ៣០/១០ Mbps ដោយមិនគិតប្រាក់ ចាប់ពីពាក់កណ្ដាលឆ្នាំ២០១៩ ដល់ ចុងខែមេសា ឆ្នាំ២០២២ សម្រាប់អ្នកមានចំណូលទាប ស្ថិតក្នុងតំបន់ដែលបានចុះក្នុងបញ្ជីកម្មវិធីរដ្ឋាភិបាល។ ដោយឡែក នៅពេលផុតកាលកំណត់ គេត្រូវបង់ប្រាក់ ២០០បាត ក្នុងមួយខែ ដើម្បីបន្តប្រើប្រាស់សេវានេះ។

លោកបន្តថា ក្រោមគម្រោង USO ភូមិឋានទាំងអស់ក្នុងប្រទេសថៃ នឹងមានអ៊ឺនធឺណិតប្រើប្រាស់។ គម្រោងនេះ មានវិសាលភាពគ្របដណ្ដប់លើភូមិឋានសរុបចំនួន ៧៤៩៨៧ កន្លែង ទូទាំងប្រទេសថៃ ដោយតភ្ជាប់ភូមិឋានទាំងនេះ ទៅកាន់តំបន់សេដ្ចកិច្ចចំនួន ៣០៦៣៥ភូមិ ដែលផ្គត់ផ្គង់អ៊ីនធឺណិតដោយក្រុមហ៊ុនឯកជន និងតំបន់ជនបទចំនួន ៤៤៣៥២ កន្លែងដែលផ្គត់ផ្គង់ដោយក្រសួងសេដ្ឋកិច្ចឌីជីថលថៃ៕