ក្រុមហ៊ុនចិនធំមួយ វិនិយោគសាងសង់ «ទីក្រុងរំដួល» នៅរាជធានីភ្នំពេញ

2018-12-27 06:58:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនSRE Group ដែលជាក្រុមហ៊ុនអភិវឌ្ឍន៍អចលនទ្រព្យដ៏ធំរបស់ចិន បានប្រារព្ធពិធីបើកការដ្ឋាន និងពិធីសម្ភោធមជ្ឈមណ្ឌលលក់ គម្រោងទីក្រុងរំដួល(ROMDUOL CITY）កាលពីថ្ងៃទី២៦ ខែធ្នូ ឆ្នាំ២០១៨។ នេះជាគម្រោងអគារពាណិជ្ជកម្ម និងលំនៅឋានលំដាប់ខ្ពស់ដំបូងគេបំផុត បែបសួនឧទ្យានបៃតង នៅក្នុងខណ្ឌសែនសុខ រាជធានីភ្នំពេញ។

នៅក្នុងពិធីបើកការដ្ឋាននេះ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ថា រាជធានីភ្នំពេញកំពុងស្ថិតនៅក្នុងដំណាក់កាលអភិវឌ្ឍយ៉ាងឆាប់រហ័សថ្មីមួយ ហើយខណ្ឌសែនសុខ ដែលគម្រោងទីក្រុងរំដួលស្ថិតនៅនេះទៀតសោត គឺជាមជ្ឈមណ្ឌល វិទ្យាសាស្ត្រ ការអប់រំ វប្បធម៌ និងសុខាភិបាល ហើយក៏ជាតំបន់អភិវឌ្ឍន៍ស្នូល សម្រាប់រាជធានីភ្នំពេញនាពេលអនាគតផងដែរ។

លោករំពឹងថា គម្រោងទីក្រុងរំដួលនេះ នឹងអាចលើកកម្ពស់ ដល់កម្រិតស្ថាបត្យកម្មទីក្រុង និងមុខមាត់របស់រាជធានីភ្នំពេញ និងនាំមកនូវថាមពលថ្មីៗបន្ថែមដល់ការអភិវឌ្ឍទីក្រុងផងដែរ។

អគ្គនាយកក្រុមហ៊ុន SRE Group លោក LIU FENG បានថ្លែងថា ការចូលមកវិនិយោគ ក្នុងប្រទេសកម្ពុជាលើកនេះ ក៏ជាការឆ្លើយតបយ៉ាងសកម្ម ចំពោះគោលនយោបាយជាយុទ្ធសាស្ត្រ “ខ្សែក្រវាត់មួយ ផ្លូវមួយ” របស់រដ្ឋាភិបាលចិនផងដែរ។ សក្តានុពលអភិវឌ្ឍន៍នៃទីផ្សារអចលនទ្រព្យ នៅក្នុងរាជធានីភ្នំពេញ និងអនាគតអភិវឌ្ឍន៍របស់ប្រទេសកម្ពុជា ដែលជាប្រទេសសេដ្ឋកិច្ចថ្មី នៅតំបន់អាស៊ីអាគ្នេយ៍ ក៏ជាមូលហេតុដែលទាក់ទាញក្រុមហ៊ុន SRE Group មកធ្វើការវិនិយោគនៅទីនេះដែរ។

លោកអគ្គនាយកបន្ថែមថា គម្រោងទីក្រុងរំដួលនេះ ស្ថិតនៅទីតាំងចន្លោះ ចំណុចកណ្តាលរាជធានីភ្នំពេញ អាកាសយានដ្ឋានអន្តរជាតិភ្នំពេញ និងតំបន់សេដ្ឋកិច្ចពិសេស និងសួនឧស្សាហកម្មធំជាងគេ។ ហេតុនេះវាស្ថិតនៅចំទីតាំងអភិវឌ្ឍន៍បំផុតក្នុងទីក្រុង ដោយមិនត្រឹមតែ ប្រមូលផ្តុំនូវធនធានអប់រំ សុខាភិបាល ពាណិជ្ជកម្ម និងចរាចរណ៍ល្អបំផុតប៉ុណ្ណោះទេ ប៉ុន្តែថែមទាំងផ្ទុកនូវតម្រូវការ លើកកម្ពស់កម្រិតលំនៅឋាន ដែលងាយស្រួល នឹងកើតមានឡើងជាទីបំផុត។

គម្រោងទីក្រុងរំដួល ត្រូវបានកំណត់ជា «សហគមន៍រស់នៅបែបអេកូឡូស៊ីអន្តរជាតិមួយ» ហើយគម្រោងនេះ នឹងត្រូវសាងសង់លើផ្ទៃដី ១៦៣២៧ម៉ែត្រការ៉េ ដោយសាងសង់លំនៅឋាន លំដាប់ខ្ពស់ចំនួន ៤អគារ ផ្សារទំនើប និងចំណតរថយន្តចំនួន២ជាន់នៅខាងក្រោម។

បើតាមលោក Matthew Hon អ្នកគ្រប់គ្រងគម្រោង «ទីក្រុងរំដួល» បានឱ្យដឹងថា នៅក្នុងសួនឧទ្យាននៃគម្រោងនេះ មានកសាងនូវកុមារដ្ឋាន តំបន់លេងទឹកសម្រាប់កុមារ អាងហែលទឹកខាងក្រៅ មជ្ឈមណ្ឌលស្ប៉ា សួនហាត់ប្រាណក្នុងទឹក តំបន់កម្មវិធីសម្រាកកម្សាន្តខាងក្រៅ ស្ថានីយពហុបំណង មជ្ឈមណ្ឌលអាហារ និងហេដ្ឋារចនាសម្ព័ន្ធទ្រទ្រង់ផ្សេងៗទៀត៕

ប្រភព៖ ដើមអម្ពិល ប្រែសម្រួល៖ សំភី