ឆ្នាំថ្មីខាងមុខ ត្រាំ គ្រោងផ្ដល់កាដូទឹកភ្នែកមួយឲ្យ Huawei និង ZTE

2018-12-27 08:17:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប្រធានាធិបតីអាមេរិក ដូណាល់ ត្រាំ គ្រោងចេញបទបញ្ជាប្រតិបត្តិថ្មីមួយនៅដើមឆ្នាំ២០១៩ ដើម្បីប្រកាសភាពអាសន្ន ដោយបិទមិនឲ្យក្រុមហ៊ុនអាមេរិកប្រើប្រាស់ឧបករណ៍ទូរគមនាគមន៍ ដែលផលិតដោយក្រុមហ៊ុនចិនចំនួនពីរ គឺ Huawei និង ZTE ។ នេះបើតាមប្រភពប្រាប់ទៅកាន់សារព័ត៌មាន Reuters កាលពីពេលថ្មីៗនេះ។

លោក ត្រាំ ស៊ីញេលើបទបញ្ជាប្រតិបត្តិមួយ កាលពីពេលកន្លងទៅ (រូប៖ Reuters)

នេះគឺជាជំហរថ្មីមួយទៀត របស់រដ្ឋបាលលោក ដូណាល់ ត្រាំ ក្នុងចេតនាកម្ចាត់ក្រុមហ៊ុន Huawei និង ZTE ពីទឹកដីអាមេរិក។ អាមេរិក បានចោទក្រុមហ៊ុនទាំងពីរ ថាបានធ្វើការឲ្យរដ្ឋាភិបាលចិនដើម្បីធ្វើចារកម្មលើអាមេរិក។

ប្រភពពីឧស្សាហកម្មទូរគមនាគមន៍ និងរដ្ឋបាលលោកត្រាំ បានប្រាប់ Reuters ថា បទបញ្ជាប្រតិបត្តិរបស់លោកត្រាំ ដែលត្រូវបានពិភាក្សាជាង ៨ខែនោះ អាចនឹងត្រូវបានចុះហត្ថលេខាដោយលោកប្រធានាធិបតីអាមេរិក នៅក្នុងខែមករា ឆ្នាំ២០១៩។ ក្រសួងពាណិជ្ជកម្មអាមេរិក នឹងហាមឃាត់ក្រុមហ៊ុនអាមេរិក មិនឲ្យទិញឧបករណ៍ពីក្រុមហ៊ុនបរទេស។

ប្រភពបន្តថា ក្នុងបទបញ្ជាប្រតិបត្តិជាលាយលក្ខណ៍អក្សរខាងលើ មិនទាន់ត្រូវបានបញ្ចប់នៅឡើយទេ និងមិនបានចារឈ្មោះ Huawei និង ZTE ក្នុងនោះដែរ។ យ៉ាងណាប្រភពរំពឹងថា មន្ត្រីក្រសួងពាណិជ្ជកម្មអាមេរិក នឹងពន្យល់បទបញ្ជាប្រតិបត្តិនេះឲ្យបានច្បាស់លាស់។

គួររំឭកថា កាលពីខែសីហា ឆ្នាំ២០១៨ អាមេរិកចេញសេចក្ដីព្រាងគោលនយោបាយការពារជាតិមួយ ដោយហាមឃាត់មន្ត្រីរដ្ឋាភិបាលអាមេរិក ពីការប្រើប្រាស់ឧបករណ៍របស់ Huawei និង ZTE ៕

ប្រភព៖ Channelnewsasia ប្រែសម្រួល៖ លាភ.