លោក ស៊ី ជិនពីង ព្រមានប្រើកម្លាំង ប្រឆាំងនឹងការប៉ុនប៉ងប្រកាសឯករាជ្យរបស់តៃវ៉ាន់

2019-01-02 07:12:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីចិន លោក ស៊ី ជិនពីង បានព្រមានប្រើកម្លាំង និងត្រៀមចាត់វិធានការចំាបាច់ទាំងអស់ ដើម្បីប្រឆាំងនឹងសកម្មភាពផ្តាច់ខ្លួនប្រកាសឯករាជ្យរបស់តៃវ៉ាន់ និងកម្លាំងខាងក្រៅដែលជ្រៀតជ្រែកចំពោះការបង្រួបបង្រួមគ្នានេះ។ ការថ្លែងនេះ ធ្វើឡើងនៅក្នុងពិធីរំលឹកខួប៤០ឆ្នាំនៃការប្រកាសសេចក្តីថ្លែងការណ៍គោលនយោបាយរបស់ចិនទៅលើតៃវ៉ាន់ នាព្រឹកថ្ងៃទី២ ខែមករា ឆ្នាំ២០១៩ នៅសាលប្រជាជនក្នុងក្រុងប៉េកាំង។

លោក ស៊ី ជិនពីង បានប្រាប់ប្រជាជនតៃវ៉ាន់ថា ឯករាជ្យរបស់តៃវ៉ាន់ បានត្រឹមតែបង្កឱ្យមានមហន្តរាយតែប៉ុណ្ណោះ។ លោកអំពាវនាវឱ្យមានការបង្រួបបង្រួមគ្នា ប៉ុន្តែត្រូវតែធ្វើឡើងក្រោមគោលការណ៍ចិនតែមួយ។

លោក ស៊ី ជិនពីង ថ្លែងនាព្រឹកថ្ងៃទី២ មករា ២០១៩ នៅសាល Great Hall ក្នុងក្រុងប៉េកាំង (រូបថត៖ Reuters)

«**យើងបានសម្រេចជោគជ័យដ៏មហិមា ក្នុងការកម្ទេចក្រុមដែលចង់ឯករាជ្យ ឬសកម្មភាពបំបែកខ្លួនណាមួយ។ គ្មាននរណាម្នាក់ គ្មានបក្សណាទាំងអស់ ដែលអាចផ្លាស់ប្តូរការពិតនៃប្រវត្តិសាស្រ្តថា តៃវ៉ាន់គឺជាផ្នែកមួយរបស់ចិន**»។ នេះជាការលើកឡើងបន្ថែមរបស់លោកប្រធានាធិបតីចិន។

សូមបញ្ជាក់ថា បញ្ហាតៃវ៉ាន់គឺជាបញ្ហាដ៏រសើបបំផុតមួយរបស់ចិន ជាពិសេសចិនបានបង្កើនសម្ពាធទៅលើតៃវ៉ាន់ បន្ទាប់ពីលោកស្រី Tsai Ing-wen មកពីគណបក្សវឌ្ឍនភាពប្រជាធិបតេយ្យដែលតែងតែមានមហិច្ឆតាចង់ប្រកាសឯករាជ្យនោះ ចូលកាន់តំណែងជាប្រធានាធិបតីតៃវ៉ាន់ ក្នុងឆ្នាំ២០១៦៕

ប្រភព៖ Aljazeera ប្រែសម្រួល៖ សំភី