ឡាវ-វៀតណាម គ្រោងសង់ផ្លូវល្បឿនលឿនភ្ជាប់រដ្ឋធានីទាំង២ ប្រវែងជាង ៧០០គីឡូម៉ែត្រ

2019-01-03 09:13:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសឡាវ និងវៀតណាម មានគម្រោងសង់ផ្លូវល្បឿនលឿន វៀងចន្ទន៍-ហាណូយ ប្រវែងសរុប ៧០៧គីឡូម៉ែត្រ ដើម្បីធ្វើឱ្យប្រសើរឡើងនូវការដឹកជញ្ជូនរវាងប្រទេសទាំង២។ គម្រោងនេះ នឹងត្រូវលើកយកមកពិភាក្សាបន្ថែមក្នុងជំនួបរវាងនាយករដ្ឋមន្រ្តីនៃប្រទេសទាំង២ នាពេលខាងមុខនេះ។

យោងតាមវេបសាយ Vientianetimes ដែលដកស្រង់ចេញពីរបាយការណ៍មួយឱ្យដឹងថា ផ្លូវល្បឿនលឿនដែលមាន ៦គន្លងនេះ នឹងត្រូវចំណាយប្រមាណ ៤,៥ពាន់លានដុល្លារ ក្នុងការសាងសង់។ ចំពោះការចំណាយដ៏ច្រើននេះ រដ្ឋាភិបាលទាំង២ ក៏កំពុងស្វែងរកការគាំទ្រហិរញ្ញវត្ថុពីប្រទេសជប៉ុនផងដែរ។

រូបតំណាង

នៅក្នុងអនុស្សារណៈនៃការយោគយល់គ្នាមួយរវាងរដ្ឋាភិបាលឡាវ និងវៀតណាម ស្តីអំពីកិច្ចសហប្រតិបត្តិការដឹកជញ្ជូនសម្រាប់ឆ្នាំ ២០១៦-២០២៥ កាលពីខែកញ្ញា ឆ្នាំ២០១៥ ឱ្យដឹងថា ភាគីទាំង២ បានកំណត់យកគម្រោងផ្លូវល្បឿលឿន វៀងចន្ទន៍-ហាណូយ និងផ្លូវដែក វៀងចន្ទន៍-វ៉ុងអាង ជាគម្រោងយុទ្ធសាស្រ្តដែលត្រូវអនុវត្តយ៉ាងឆាប់រហ័ស ដើម្បីជំរុញពាណិជ្ជកម្មទ្វេភាគី។

ទំហំពាណិជ្ជកម្មរវាងឡាវ និងវៀតណាម បានឈានដល់ ៩០០លានដុល្លារក្នុងឆ្នាំ២០១៧ កើនឡើង ១០% បើប្រៀបធៀបនឹងឆ្នាំ២០១៦។ ប្រទេសទាំង២ បានកំណត់គោលដៅសម្រេចទំហំពាណិជ្ជកម្មឱ្យបានដល់ ៤ពាន់លានដុល្លារ នៅត្រឹមឆ្នាំ២០២០។

សូមជម្រាបថា នាយករដ្ឋមន្រ្តីឡាវ លោក ថងលូន ស៊ីសូលីត នឹងដឹកនាំគណៈប្រតិភូជាន់ខ្ពស់ ទៅបំពេញទស្សនកិច្ចនៅវៀតណាម ពីថ្ងៃទី៥ ដល់ ៦ ខែមករា ឆ្នាំ២០១៩ តបតាមការអញ្ជើញរបស់នាយករដ្ឋមន្រ្តីវៀតណាម លោក ង្វៀន សួនហ៊្វុក៕

ប្រភព៖ Vientiane Times ប្រែសម្រួល៖ សំភី