មានអ្វីពិសេស ទើបមេដឹកនាំកូរ៉េខាងជើង តែងតែជិះរថភ្លើងទៅចិន?

2019-01-08 07:50:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មេដឹកនាំកូរ៉េខាងជើង លោក គីម ជុងអ៊ុន បានទៅដល់ក្រុងប៉េកាំង ប្រទេសចិន នៅថ្ងៃអង្គារ ទី៨ ខែមករា ឆ្នាំ២០១៩នេះ តាមរថភ្លើងពិសេសផ្ទាល់ខ្លួនរបស់លោក ក្នុងគោលបំណងធ្វើដំណើរទស្សនកិច្ចរយៈពេល ៤ថ្ងៃ និងជួបជាមួយលោកប្រធានាធិបតីចិន ស៊ី ជីនពីង។

តើមានលក្ខណៈពិសេសអ្វីខ្លះ ដែលធ្វើឲ្យមេដឹកនាំកូរ៉េខាងជើងតែងតែប្រើប្រាស់មធ្យោបាយធ្វើដំណើរមួយនេះ?

រថភ្លើងរបស់មេដឹកនាំកូរ៉េខាងជើង

យោងតាមសារព័តមាន The New York Times ចុះកាលពីខែមីនា ឆ្នាំ២០១៨ ដែលបានដកស្រង់ពីរបាយការណ៍ស៊ើបអង្កេតនានា បានឲ្យដឹងថា រថភ្លើងរបស់មេដឹកនាំកូរ៉េខាងជើង មានតួរថភ្លើងចំនួន ៩០ ដែលត្រូវបានបំពាក់ប្រព័ន្ធសុវត្ថិភាពខ្ពស់។ ជំនាន់លោក គីម ជុងអ៊ីល ដែលជាឪពុកលោក គីម ជុងអ៊ុន គឺលោកជិះរថភ្លើងមួយខ្សែ ដែលអមដំណើរដោយរថភ្លើង ២ខ្សែទៀត។ រថភ្លើង ២ខ្សែនោះ គឺ ១គ្រឿងបើកទៅមុន ដើម្បីការពារសុវត្ថិភាពមេដឹកនាំកូរ៉េខាងជើង ខណៈ១គ្រឿងទៀត បើកតាមក្រោយ ដោយមានផ្ទុកអង្គរក្ស និងគ្រឿងផ្គត់ផ្គង់ផ្សេងៗ។

ប្រភពបន្តថា តួរថភ្លើងនីមួយៗ មិនអាចបាញ់ទម្លុះដោយគ្រាប់កាំភ្លើងបានឡើយ។ កត្តានេះ ធ្វើឲ្យរថភ្លើងមានទម្ងន់ធ្ងន់ជាងមធ្យម ដែលធ្វើឲ្យរថភ្លើងបើកបានយឺត។ ជាទូទៅ វារត់ក្នុងល្បឿនប្រមាណតែ ៦០គីឡូម៉ែត្រក្នុងមួយម៉ោងប៉ុណ្ណោះ។

ក្នុងសម័យកាលរបស់លោក គីម ជុងអ៊ីល លោកតែងតែយកអង្គរក្សតាមខ្លួនចំនួន ១០០នាក់ ឲ្យជិះរថភ្លើងបើកមុខ ដើម្បីស្វែងរកគ្រាប់បែក និងការគំរាមកំហែងផ្សេងៗ ព្រមទាំងសាកល្បងសុវត្ថិភាពរបស់ផ្លូវដែក។ បន្ថែមពីនេះ ឧទ្ធម្ភាគចក្រ និងយន្តហោះ ត្រូវបើកអមដំណើរ ដើម្បីពង្រឹងបន្ថែមសុវត្ថិភាពរបស់មេដឹកនាំកូរ៉េខាងជើង។

លោក គីម ជុងអ៊ុន ចេញពីក្នុងរថភ្លើង

ប្រភពខាងលើឲ្យដឹងទៀតថា ស្ថានីយរថភ្លើងចំនួន ២០ ត្រូវបានសាងសង់នៅទូទាំងប្រទេសកូរ៉េខាងជើង សម្រាប់ការប្រើប្រាស់របស់មេដឹកនាំរបស់ខ្លួន។

សម្រាប់ផ្នែកខាងក្នុងវិញ រថភ្លើងរបស់មេដឹកនាំកូរ៉េខាងជើង ត្រូវបានរាយការណ៍ថា មានបន្ទប់សន្និសីទសារព័ត៌មាន បន្ទប់ទទួលទានអាហារ ការិយាល័យមេដឹកនាំកូរ៉េខាងជើងដែលមានបំពាក់តុនិងកុំព្យូទ័រ។

លោកគីម ជុងអ៊ុន ត្រូវបានរាយការណ៍ដែរថា លោកខ្លាចក្នុងការធ្វើដំណើរតាមយន្តហោះ ជំនួសវិញដោយរថភ្លើងដែលបំពាក់ប្រព័ន្ធទំនាក់ទំនងទំនើបៗ។ បើតាមមន្ត្រីរុស្ស៊ី លោក Konstantin Pulikovsky ដែលបានរួមដំណើរតាមរថភ្លើងជាមួយអតីតមេដឹកនាំកូរ៉េខាងជើងទៅកាន់ប្រទេសរុស្ស៊ី កាលពីឆ្នាំ២០១១ នៅលើរថភ្លើង គេបានរៀបចំមុខម្ហូបសម្រាប់មេដឹកនាំកូរ៉េខាងជើង ដែលមុខម្ហូបមានប្រភពមកពីរុស្ស៊ី ចិន កូរ៉េ ជប៉ុន និងបារាំង៕