ចិន ចេញទូរសព្ទអាចបត់អេក្រង់លើកដំបូង ដំណើរការដោយ Water OS

2019-01-09 06:50:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនចិន Royal ដែលមានមូលដ្ឋាននៅក្រុងសិនជិន បានធ្វើការប្រកាសបង្ហាញជាផ្លូវការនូវស្មាតហ្វូនកូនកាត់ថេប្លេត ដែលមានអេក្រង់អាចបត់បាន ជាលើកដំបូងរបស់ខ្លួន នៅក្នុងព្រឹត្តិការណ៍បច្ចេកវិទ្យា CES 2019 កាលពីថ្ងៃទី៨ ខែមករា ឆ្នាំ២០១៩។

ស្មាតហ្វូនកូនកាត់ថេប្លេត FlexPai (រូប៖ Megacorp)

ស្មាតហ្វូនកូនកាត់ថេប្លេត ឈ្មោះ FlexPai មានអេក្រង់ទំហំ ៧,៨អ៊ីញ ឈ្មោះ Cicada Wing ដែលគេស្គាល់តាមរយៈប៉ាតង់របស់ក្រុមហ៊ុន ប្រភេទ AMOLED ដែលអាចបត់បាន។

លោក Meng Zhiyan តំណាងក្រុមហ៊ុន បានប្រាប់ថា ស្មាតហ្វូននេះដំណើរការដោយប្រព័ន្ធប្រតិបត្តិការ Android របស់ Google ដែលគេឲ្យឈ្មោះថា Water OS ។ ទំហំផ្ទុក គឺ 128 GB អមដោយ RAM 6GB ឬ 256 GB, RAM 8GB និងអាចបន្ថែមមេម៉ូរីក្រៅដល់ 256GB។ ទំហំថ្ម មាន 4000 mAh។

លោក Meng បន្ថែមថា ស្មាតហ្វូនដ៏ទំនើបនេះ អាចបត់ពី ០ ដល់ ១៨០ ដឺក្រេ ហើយមានអាយុកាលបត់រហូតដល់ ២០ម៉ឺនដង។ សម្រាប់បច្ចុប្បន្ន ស្មាតហ្វូននេះទើបតែត្រូវបានដាក់លក់លើទីផ្សារចិនប៉ុណ្ណោះ ដោយមានតម្លៃស្មើនឹង ១៣០០ដុល្លារអាមេរិក កាលពីខែតុលា ឆ្នាំ២០១៨។ ក្រុមហ៊ុន គ្រោងនាំចេញទៅលក់នៅក្នុងសហរដ្ឋអាមេរិកផងដែរ។

សូមជម្រាបថា នេះជាការបង្ហាញស្មាតហ្វូនអេក្រង់បត់បានឡើងដំបូងជាផ្លូវការរបស់ក្រុមហ៊ុន Royale បន្ទាប់ពីក្រុមហ៊ុន Samsung បង្ហើបឲ្យឃើញពីស្មាតហ្វូនដែលអេក្រង់របស់វាអាចបត់បានរបស់ខ្លួន កាលពីខែវិច្ឆិកា ឆ្នាំ២០១៨។ ស្មាតហ្វូនដែលមិនទាន់បង្ហាញជាផ្លូវការនោះ មានទំហំអេក្រង់ ៧,៣អ៊ីញ៕

ប្រភព៖ Channelnewsasia ប្រែសម្រួល៖ លាភ.