រោងចក្រក្នុងតំបន់សេដ្ឋកិច្ចពិសេសក្រុងព្រះសីហនុ ផលិតអ្វីខ្លះ?
- 2019-01-10 04:49:26
- ចំនួនមតិ 0 | ចំនួនចែករំលែក 0
រោងចក្រក្នុងតំបន់សេដ្ឋកិច្ចពិសេសក្រុងព្រះសីហនុ ផលិតអ្វីខ្លះ?
ចន្លោះមិនឃើញ
ផលិតផលដែលផលិតចេញពីរោងចក្រនៅក្នុងតំបន់សេដ្ឋកិច្ចពិសេសក្រុងព្រះសីហនុរួមមាន៖ គ្រឿងអេឡិចត្រូនិក ខ្សែបង្គុំអគ្គិសនី សំបកកង់រថយន្ត គ្រឿងបន្លាស់រថយន្ត ស៊ុមទូរទស្សន៍ សម្ភារៈបរិក្ខារបន្ទប់ទឹក ផលិតផលក្តារប៉ាកេ និងក្តារបន្ទះ សម្ភារៈការិយាល័យ វត្ថុអនុស្សាវរីយ៍ សម្ភារៈបរិក្ខារកីឡា សម្លៀកបំពាក់ ស្បែកជើង កាបូប និងវ៉ាលីស និងសម្ភារៈប្រើប្រាស់ក្នុងផ្ទះ។ នេះបើតាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី១០ ខែមករា ឆ្នាំ២០១៩។
បច្ចុប្បន្ន នៅក្នុងតំបន់សេដ្ឋកិច្ចពិសេសក្រុងព្រះសីហនុ មានក្រុមហ៊ុនចំនួន ១៦១ បានចុះបញ្ជីវិនិយោគ ដែលមានដើមទុនសរុបចំនួនប្រមាណ ៩១៨លានដុល្លារ និងបានស្រូបយកកម្លាំងពលកម្មចំនួន ២២ ៤៩៥នាក់។ ក្នុងឆ្នាំ២០១៨ ការនាំចេញពីតំបន់សេដ្ឋកិច្ចពិសេសនេះ មានទំហំប្រមាណ ៣៧២លានដុល្លារ កើនឡើង ៦៨% បើប្រៀបធៀបនឹងការនាំចេញនៅឆ្នាំ២០១៧។
តំបន់សេដ្ឋកិច្ចពិសេសក្រុងព្រះសីហនុ ត្រូវបានបង្កើតឡើងតាមរយៈអនុក្រឹត្យលេខ២៤អនក្រ. បក ចុះថ្ងៃទី១៧ ខែមីនា ឆ្នាំ២០០៨ លើទំហំផ្ទៃដី ១១១៣ហិកតា។ តំបន់សេដ្ឋកិច្ចនេះ មានទីតាំងស្ថិតនៅស្រុកព្រៃនប់ ខេត្តព្រះសីហនុ ចម្ងាយប្រមាណ ១៣គីឡូម៉ែត្រពីកំពង់ផែក្រុងព្រះសីហនុ។
បច្ចុប្បន្ននេះ ក្រុមហ៊ុនអភិវឌ្ឍន៍តំបន់សេដ្ឋកិច្ចពិសេសក្រុងព្រះសីហនុ បានរៀបចំហេដ្ឋារចនាសម្ព័ន្ធក្នុងតំបន់លើផ្ទៃដីចំនួន ៦២៨ហិកតា ដូចជា ផ្លូវថ្នល់ បណ្តាញអគ្គិសនី ទឹកស្អាត ប្រព័ន្ធប្រព្រឹត្តកម្មទឹកកខ្វក់ អគារការិយាល័យរដ្ឋបាល និងមជ្ឈមណ្ឌលបណ្តុះបណ្តាលជំនាញវិជ្ជាជីវៈ។
សូមជម្រាបថា នៅព្រឹកថ្ងៃទី១០ ខែមករា ឆ្នាំ២០១៩ នៅតំបន់សេដ្ឋកិច្ចពិសេសក្រុងព្រះសីហនុ មានការរៀបចំកិច្ចប្រជុំលើកទី៣នៃគណៈកម្មាធិការសម្របសម្រួលតំបន់សេដ្ឋកិច្ចពិសេសក្រុងព្រះសីហនុ ក្រោមអធិបតីភាពលោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោក Qian Kemling អនុរដ្ឋមន្រ្តីក្រសួងពាណិជ្ជកម្មចិន។ កិច្ចប្រជុំនេះ ធ្វើឡើងក្នុងក្របខណ្ឌនៃកិច្ចព្រមព្រៀងសហប្រតិបត្តិការរវាងភាគីកម្ពុជា និងចិន ស្តីពីការអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ ដែលបានចុះហត្ថលេខានៅថ្ងៃទី១៣ ខែធ្នូ ឆ្នាំ២០១០៕