វេបសាយគ្រឹះស្ថានអង្គរ ត្រូវបានធ្វើទំនើបកម្មដែលផ្តល់ព័ត៌មានជាក់ស្តែងពីការលក់សំបុត្រ
- 2019-01-11 07:52:12
- ចំនួនមតិ 0 | ចំនួនចែករំលែក 0
វេបសាយគ្រឹះស្ថានអង្គរ ត្រូវបានធ្វើទំនើបកម្មដែលផ្តល់ព័ត៌មានជាក់ស្តែងពីការលក់សំបុត្រ
ចន្លោះមិនឃើញ
វេបសាយថ្មីរបស់គ្រឹះស្ថានអង្គរដែលមានអាសយដ្ឋាន www.angkorenterprise.gov.kh ត្រូវបានដាក់ឱ្យដំណើរការហើយនៅព្រឹកថ្ងៃទី១១ ខែមករា ឆ្នាំ២០១៩ ក្រោមអធិបតីភាពលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា វេបសាយនេះ ត្រូវបានរៀបចំសារជាថ្មីដោយអ្នកជំនាញ ដើម្បីឱ្យមានភាពទាក់ទាញ ងាយស្រួល និងផ្តល់ព័ត៌មានបន្ថែមជាច្រើនដល់សាធារណជនក្នុងស្រុក និងអន្តរជាតិ និងជាពិសេស គឺផ្តល់ព័ត៌មានជាក់ស្តែងភ្លាមៗ ស្តីពីការលក់សំបុត្រចូលទស្សនារមណីយដ្ឋានអង្គរ។
វេបសាយថ្មីរបស់គ្រឹះស្ថានអង្គរនេះ ក៏នឹងផ្តល់ព័ត៌មានមួយចំនួនស្តីពីដំណើរទេសចរក្នុងតំបន់អង្គរ និងតំបន់ប្រាសាទនានា សំដៅជួយលើកស្ទួយដល់វិស័យទេសចរណ៍ និងផ្តល់ភាពងាយស្រួលដល់ភ្ញៀវទេសចរ ក្នុងការរៀបចំដំណើរកម្សាន្តរបស់ខ្លួន។
បើតាមសេចក្តីប្រកាសព័ត៌មានដដែល វេបសាយនេះ មានជា ៥ភាសា គឺភាសាខ្មែរ ចិន អង់គ្លេស ជប៉ុន និងកូរ៉េ ហើយអាចប្រើប្រាស់យ៉ាងងាយស្រួលនៅលើទូរសព្ទដៃ និងឧបករណ៍អេឡិចត្រូនិចផ្សេងៗទៀត។ ជាងនេះទៀត សាធារណជនអាចចូលទៅពិនិត្យមើលចំនួនសំបុត្រដែលលក់បានជាក់ស្តែង (Real Time Data) នៅលើវេបសាយថ្មីនេះផងដែរ។
សូមរំលឹកថា កាលពីឆ្នាំ២០១៨កន្លងទៅ គ្រឹះស្ថានអង្គរ បានលក់បណ្ណជូនភ្ញៀវទេសចរអន្តរជាតិចំនួន ២,៥៩លាននាក់ ដោយទទួលបានចំណូលសរុបចំនួន ១១៦លានដុល្លារ។ ក្នុងនោះ ចំណូលដែលបានបង់ចូលថវិការដ្ឋមានចំនួនជាង ១១០លានដុល្លារ (៤៤៥ពាន់លានរៀល) ស្មើនឹង ១០១,៥% នៃច្បាប់ថវិកាជាតិឆ្នាំ២០១៨ និងឧបត្ថម្ភមូលនិធិជូនមន្ទីរពេទ្យគន្ធបុប្ផា ចំនួនសរុប ៥,១៨លានដុល្លារ៕