អ្នកវិទ្យាសាស្រ្តកំពុងរកវិធីទប់ស្កាត់ ខណៈវត្ថុបង្កគ្រោះថ្នាក់ដល់ផែនដីមានដល់ជិត ២ម៉ឺន

2019-01-17 04:18:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រហូតមកដល់ពេលនេះ អ្នកស្រាវជ្រាវ បានអង្កេតឃើញវត្ថុដែលអាចបង្កគ្រោះថ្នាក់ដល់ផែនដីប្រមាណ ១៨០០០ ក្នុងទីអវកាស ក្នុងនោះ ៩៩% គឺជាអាចម៌ផ្កាយ។ នេះបើយោងតាមការចុះផ្សាយរបស់ Sputnik News នៅថ្ងៃទី១៧ ខែមករា ឆ្នាំ២០១៩។

លោក Boris Shustov នាយកផ្នែកវិទ្យាសាស្រ្តនៃវិទ្យាស្ថានតារាសាស្រ្តរបស់បណ្ឌិត្យសភាវិទ្យាសាស្រ្តរុស្ស៊ី (RAS) បានប្រាប់សារព័ត៌មាននេះថា RAS បានយល់ព្រមលើការអភិវឌ្ឍកម្មវិធីជាតិមួយ ដើម្បីស្រាវជ្រាវអំពីបញ្ហានេះ និងរកវិធីទប់ស្កាត់ចំពោះវត្ថុអវកាសដែលបង្កគ្រោះថ្នាក់ ដូចជាអាចម៌ផ្កាយ ផ្កាយដុះកន្ទុយ និងបំណែកអវកាសជាដើម។

លោកបន្តថា បច្ចុប្បន្ននេះ ប្រទេសមួយចំនួនជាពិសេសសហរដ្ឋអាមេរិក បានឈានមុខគេក្នុងការអភិវឌ្ឍប្រព័ន្ធសម្រាប់ការអង្កេតវត្ថុអវកាសដែលមានគ្រោះថ្នាក់។

អ្នកស្រាវជ្រាវរូបនេះ បានរំលឹកថា កាលពីឆ្នាំ២០១០ RAS បានស្នើរួចមកហើយថា កម្មវិធីសម្រាប់ការទប់ស្កាត់ការគំរាមពីអាចម៌ផ្កាយ ផ្កាយដុះកន្ទុយ និងបំណែកអវកាស គួរតែត្រូវបានផ្តួចផ្តើមធ្វើឡើង ប៉ុន្តែវាត្រូវបានច្រានចោលដោយអង្គការអវកាសរុស្ស៊ី Roscosmos។

កាលពីឆ្នាំ២០១៧ ភ្នាក់ងារអវកាសអឺរ៉ុប (ESA) បានឱ្យដឹងថា មានវត្ថុអវកាសមួដែលមានទំហំ ១៥ ទៅ ៣០ម៉ែត្រ បានហោះកាត់ផែនដី ក្នុងចម្ងាយ ៤៤០០០គីឡូម៉ែត្រ។ ភ្នាក់ងារនេះ អះអាងថា ប្រសិនបើវាធ្លាក់ចូលផែនដី នោះវានឹងបង្កឥទ្ធិពលដូចអាចម៌ផ្កាយមួយដែលបានធ្លាក់នៅតំបន់ Chelyabinsk Oblast ប្រទេសរុស្ស៊ី ដោយបង្កការបំផ្លិចបំផ្លាញយ៉ាងធ្ងន់ធ្ងរ កាលពីឆ្នាំ២០១៣ដូច្នោះដែរ៕

ប្រភព៖ Sputnik News ប្រែសម្រួល៖ សំភី