ឥណ្ឌា គ្រោងសង់ផ្លូវនៅតាមបណ្តោយព្រំដែនចិន ដើម្បីងាយស្រួលចល័តទ័ព

2019-01-17 06:50:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ឥណ្ឌា គ្រោងនឹងចំណាយ ២,៩ពាន់លានដុល្លារ ដើម្បីសាងសង់ផ្លូវចំនួន៤៤ខ្សែ នៅតាមបណ្តោយព្រំដែនចិន ដើម្បីធានាដល់ភាពរហ័សនៃការចល័តទ័ព ក្នុងករណីដែលមានការប៉ះទង្គិចគ្នារវាងប្រទេសទាំង២។ នេះបើតាមការចុះផ្សាយរបស់ South China Morning Post នៅថ្ងៃទី១៧ ខែមករា ឆ្នាំ២០១៩ ដែលដកស្រង់ចេញពីរបាយការណ៍របស់ក្រសួងសាធារណការកណ្តាលនៃប្រទេសឥណ្ឌា។

សំណើគម្រោងសាងសង់ផ្លូវខាងលើនេះ កំពុងរង់ចាំការយល់ព្រមពីគណៈរដ្ឋមន្រ្តីរបស់លោកនាយករដ្ឋមន្រ្តី ណារិនដ្រា មូឌី។ ទោះជាយ៉ាងណា មានផ្លូវមួយចំនួន កំពុងត្រូវបានកសាងឡើងហើយ។

ហេដ្ឋារចនាសម្ព័ន្ធផ្លូវថ្នល់ដែលស្ថិតនៅតាមបណ្តោយព្រំដែនប្រទេសឥណ្ឌា-ចិន ជាង ៤ពាន់គីឡូម៉ែត្រ ត្រូវបានឥណ្ឌាទុកចោលជាង៥០ឆ្នាំមកហើយ។ ទើបតែក្រោយពេលមានភាពតានតឹងខ្លាំងនៅតំបន់ព្រំដែន Doklam កាលពីឆ្នាំ២០១៧ ដែលជាការប្រឈមមុខដាក់គ្នារវាងកងទ័ពទាំង២ ជុំវិញការសាងសង់ផ្លូវរបស់ចិននោះ ទើបឥណ្ឌា ងាកមកចាប់អារម្មណ៍ក្នុងការកសាងផ្លូវទាំងនោះវិញ។

បើតាមលោក Jayadeva Renade ប្រធានមជ្ឈមណ្ឌលសម្រាប់វិភាគអំពីប្រទេសចិន និងយុទ្ធសាស្រ្ត នៃប្រទេសប្រទេសឥណ្ឌា បានលើកឡើងថា ការសាងសង់ផ្លូវនៅតាមបណ្តោយព្រំដែនដូច្នេះ នឹងផ្តល់ផលចំណេញ ដល់ឥណ្ឌា ដូចជាការតភ្ជាប់ ទំនាក់ទំនង សកម្មភាពសេដ្ឋកិច្ច និងងាយស្រួលដល់ការចល័តទ័ព និងឧបករណ៍យោធា។

គួររំលឹកថា កាលពីខែធ្នូកន្លងទៅ លោក មូឌី បានអញ្ជើញបើកសម្ពោធស្ពាន Bogibeel ដែលជាស្ពានដ៏វែងជាងគេបំផុតរបស់ឥណ្ឌា នៅក្នុងរដ្ឋ Assam ក្នុងក្តីសង្ឃឹមថា ស្ពាននេះនឹងផ្តល់សារៈសំខាន់ក្នុងការប្រើប្រាស់ដឹកជញ្ជូនឧបករណ៍យោធា ដោយរួមមានទាំងរថក្រោះផងដែរ៕

ចុចអាន៖ កងទ័ពចិន និងឥណ្ឌា ប៉ះទង្គិចគ្នា នៅតំបន់ព្រំដែនហិមាល័យ

ប្រភព៖ South China Morning Post ប្រែសម្រួល៖ សំភី