គម្រោងបំពាក់ប្រព័ន្ធអំពូលបំភ្លឺផ្លូវ LED បង្កើតទីក្រុងឆ្លាតវៃនៅសៀមរាប នឹងត្រូវបញ្ចប់ក្នុងឆ្នាំនេះ

2019-01-18 07:59:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងបំពាក់ប្រព័ន្ធអំពូលបំភ្លឺផ្លូវ LED បង្កើតទីក្រុងឆ្លាតវៃ ក្នុងក្រុងសៀមរាប ខេត្តសៀមរាប មិនអាចបញ្ចប់នៅក្នុងឆ្នាំ២០១៨បានឡើយ ពោលគឺត្រូវបានពន្យារពេលមកដល់ឆ្នាំ២០១៩។ នេះបើតាមការលើកឡើងរបស់លោក សុខ ថុល នាយករដ្ឋបាលសាលាខេត្តសៀមរាប ក្នុងកិច្ចប្រជុំជាមួយក្រុមហ៊ុនជប៉ុន Minebea Mistumi ដែលជាអ្នកអនុវត្តគម្រោង កាលពីថ្ងៃទី១៧ ខែមករា ឆ្នាំ២០១៩។

លោក សុខ ថុល បញ្ជាក់ថា ការពន្យារពេលបញ្ចប់គម្រោងនេះ គឺដោយសារការបញ្ជាទិញខ្សែភ្លើងត្រូវពន្យារ ដែលបណ្តាលមកពីបញ្ហានីតិវិធីហិរញ្ញវត្ថុ។ ដើមី្បធានានូវកិច្ចសហប្រតិបត្តិការ និងថែទាំក្នុងការអនុវត្តគម្រោងឲ្យមានភាពរលូនក្នុងរយៈពេល១០ឆ្នាំ សាលាខេត្តសៀមរាប នឹងត្រូវរាយការណ៍ពីទិន្នន័យទៅរដ្ឋាភិបាលជប៉ុនរយៈពេល ១០ឆ្នាំខាងមុខនេះ។

តាមការលើកឡើងរបស់ក្រុមហ៊ុន Minebea Mistumi បង្ហាញថា ក្រោមកម្មវិធីនៃការបំពាក់ប្រព័ន្ធអំពូលបំភ្លឺផ្លូវ LED ជាមួយបណ្តាញឥតខ្សែ ដែលជាបច្ចេកវិទ្យាចុងក្រោយបង្អស់នេះ គឺមានប្រសិទ្ធភាពកាត់បន្ថយការបំភាយឧស្ម័នផ្ទះកញ្ចក់។ បច្ចុប្បន្ននេះ ការប្រែប្រួលអាកាសធាតុ គឺជាបញ្ហាប្រឈមដ៏ធ្ងន់ធ្ងរមួយនៅលើពិភពលោក ដែលបណ្តាលមកពី កំណើនកំហាប់ឧស្ម័នផ្ទះកញ្ចក់ ក្នុងបរិយាកាស ដូច្នេះទើបត្រូវមានវិធានការជាច្រើនត្រូវបានលើកឡើង ដើម្បីកាត់បន្ថយការ បញ្ចេញឧស្ម័នផ្ទះកញ្ចក់។

លោក នាយករដ្ឋបាលសាលាខេត្ត បានបញ្ជាក់ថា ដោយបច្ចេកវិទ្យាទំនើប រាល់អំពូលភ្លើងដែលបានបំពាក់បំភ្លឺនៅតាមដងផ្លូវក្នុងក្រុងសៀមរាប អាចគ្រប់គ្រងដោយបណ្តាញឥតខ្សែ ជួយដល់ការបិទបើកអំពូលបំភ្លឺផ្លូវកាន់តែមានភាពងាយស្រួល។

ក្នុងនោះដែរលោក សុខ ថុល ក៏បានលើកឡើងផងដែរ ពីចក្ខុវិស័យនាពេលអនាគតរបស់ខេត្តសៀមរាប ក្នុងការលើកកម្ពស់ទីក្រុងប្រវត្តិសាស្ត្រមួយនេះ ឲ្យក្លាយជាទីក្រុងស្អាត សុវត្ថិភាព ងាយស្រួលសម្រាប់អ្នករស់នៅ និងជាគោលដៅរបស់ភ្ញៀវទេសចរនៅលើពិភពលោក ចូលមកទស្សនាកម្សាន្ត តាមរយៈធ្វើឲ្យប្រសើរឡើង ក្នុងការឆ្ពោះទៅគោលដៅ "ទីក្រុងឆ្លាតវៃ"។

ជាមួយគ្នានោះ លោកក៏បានស្នើឱ្យក្រុមហ៊ុន Minebea Mistumi ធ្វើការបំពាក់នូវភ្លើងសញ្ញាចរាចរណ៍វៃឆ្លាត ក្នុងក្រុងសៀមរាប ដើមី្បធានាបាននូវសុវត្ថិភាពចរាចរណ៍ ដល់ភ្ញៀវជាតិ និងអន្តរជាតិ រួមទាំងសន្តិសុខទៀតផង៕

អត្ថបទ៖ សំភី