ក្រុមបាល់ទាត់​ជម្រើសជាតិវៀតណាម បាន​ក្លាយជា​ក្រុម​អាស៊ាន​តែមួយគត់ ដែល​អាច​ឡើង​ដល់​វគ្គ ៨ក្រុម​ចុងក្រោយ AFC Asian Cup 2019 ក្រោយ​​យកឈ្នះ​ក្រុម​ខ្លាំង​ហ្សកដានី ដោយ​បាល់​ប៉េណាល់ទី​កាត់សេចក្ដី ៤-២ (ស្មើគ្នា ១-១ ក្នុង ១២០នាទី) កាលពីយប់មិញ។

នៅក្នុងការប្រកួតនេះ ហ្សកដានី បាននាំមុខ​មុន នៅនាទី ៣៩ ដោយ​កីឡាករ Abdel-Rahman ប៉ុន្តែ​វៀតណាម បាន​តាម​ស្មើ​វិញ​នៅនាទី ៥១ ដោយ​ខ្សែប្រយុទ្ធ Nguyen Cong Phuong។ លទ្ធផល​ស្មើគ្នានេះ បាន​បន្ត​រហូត​ដល់​ចប់​នាទី ៩០ និង​ចប់​ម៉ោង​បន្ថែម ១៥នាទី ២ដង។ ចូល​ដល់​វគ្គ​ប៉េណាល់ទី​កាត់សេចក្ដី វៀតណាម ស៊ុត​ចូល ៤គ្រាប់ ខណៈ​ហ្សកដានី អាច​ស៊ុត​ចូល​តែ២គ្រាប់​ប៉ុណ្ណោះ។

ចំណែក​ថៃ ដែល​ជា​ក្រុម​អាស៊ាន​មួយទៀត បាន​ចាញ់​ក្រុម​ចិន ដោយ​លទ្ធផល ២-១ មិន​អាច​បន្ត​ទៅវគ្គ ៨ក្រុម​ចុងក្រោយ បាននោះទេ។

ក្រោយជ័យជម្នះនេះ វៀតណាម នឹង​បន្ត​ប្រកួត​នៅ​​វគ្គ ៨ក្រុម​ចុងក្រោយ នាថ្ងៃទី ២៤ ខែមករា ដោយ​ត្រូវ​ប៉ះ​ក្រុម​លំដាប់ World Cup គឺ ជប៉ុន ឬ អារ៉ាប៊ីសាអូឌីត (ជប៉ុន និងអារ៉ាប៊ីសាអូឌីត ត្រូវប្រកួតគ្នា​ល្ងាច​នេះ)។

គួររំលឹកផងដែរថា វៀតណាម ធ្លាប់​ឡើង​ដល់​វគ្គ ៨ក្រុម​ចុងក្រោយ​នៃ​ពាន​រង្វាន់​នេះ ម្ដង​រួចហើយ កាលពីឆ្នាំ ២០០៧ ដែល​ពេល​នោះ វៀតណាម​ គឺ​ជា​ក្រុម​ម្ចាស់ផ្ទះ៕

សូមទស្សនា​វីដេអូ​ហាយឡាយ​ខាងក្រោមនេះ៖