មហាសេដ្ឋី២៦នាក់ មានទ្រព្យសម្បត្តិស្មើមនុស្សពាក់កណ្ដាលផែនដី

2019-01-21 08:12:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមរបាយការណ៍ប្រចាំឆ្នាំ២០១៨ របស់អង្គការសប្បុរសធម៌ Oxfam បានបង្ហាញថា មហាសេដ្ឋីចំនួន ២៦នាក់ មានទ្រព្យសម្បត្តិស្មើនឹងប្រជាជនដែលស្ថិតនៅក្រោមខ្សែបន្ទាប់ក្រីក្រចំនួន ៣,៨ ពាន់លាននាក់ នៃចំនួនប្រជាជនសរុបជាង ៧,៦ពាន់លាននាក់ នៅលើពិភពលោក។ របាយការណ៍របស់អង្គការ Oxfam ត្រូវបានចេញផ្សាយ មុនវេទិកាសេដ្ឋកិច្ចពិភពលោក នៅក្រុង Davos ប្រទេសស្វីស ដែលចាប់ផ្ដើមពីថ្ងៃទី២២ ដល់ ២៥ ខែមករា ឆ្នាំ២០១៩។

លោក Jeff Bezon ម្ចាស់ក្រុមហ៊ុនលក់ទំនិញអនឡាញ Amazon ជាអ្នកមានបំផុតនៅលើពិភពលោក

Oxfam បានឲ្យដឹងថា មហាសេដ្ឋីនៅទូទាំងពិភពលោក បានកើនឡើងជាង ២២០០នាក់ ហើយទ្រព្យសម្បត្តិរបស់ពួកគេ សរុបបានកើនរហូតដល់ ៩០០ពាន់លានដុល្លារអាមេរិក ក្នុងឆ្នាំ២០១៨ (កើន ២,៥ពាន់លានដុល្លារក្នុងមួយថ្ងៃ)។ ទ្រព្យសម្បត្តិរបស់មហាសេដ្ឋីលើពិភពលោក បានកើនឡើង ១២% ខណៈទ្រព្យសម្បត្តិរបស់អ្នកក្រពាក់កណ្ដាលពិភពលោក ថយចុះ ១១% ។

របាយការណ៍ដដែលបន្តថា ក្នុងរយៈពេល ១០ឆ្នាំ ក្រោយវិបត្តិសេដ្ឋកិច្ចពិភពលោក ចំនួនមហាសេដ្ឋីបានកើនឡើងជិត ២ដង។ ក្នុងនោះ ចន្លោះពីឆ្នាំ២០១៧ ដល់ ២០១៨ មានមហាសេដ្ឋីកើតថ្មីចំនួនម្នាក់ ក្នុងរយៈពេល ២ថ្ងៃម្ដង។

របាយការណ៍បន្តថា លោក Jeff Bezon ម្ចាស់ក្រុមហ៊ុនលក់ទំនិញអនឡាញ Amazon ជាអ្នកមានទ្រព្យសម្បត្តិច្រើនបំផុត នៅលើពិភពលោក។ បច្ចុប្បន្ន លោកមានទ្រព្យសម្បត្តិរហូតដល់ ១១២ ពាន់លានដុល្លារអាមេរិក (ទ្រព្យសម្បត្តិរបស់លោក ១% ស្មើនឹងកញ្ចប់ថវិកាត្រៀមសម្រាប់ការគាំពារសុខភាពប្រជាជនប្រទេសអេត្យូពី ដែលមានប្រជាជនប្រមាណ ១០៥លាននាក់)៕

ប្រភព៖ theguardian ប្រែសម្រួល៖ លាភ.