នាយករដ្ឋមន្រ្តីវៀតណាម បញ្ជាឱ្យរៀបចំសង់ស្ថានីយគ្រប់គ្រងអវកាស ក្រោយបង្ហោះផ្កាយរណប "នាគច្រមក់"

2019-01-22 07:58:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ង្វៀន សួនហ៊្វុក នាយករដ្ឋមន្រ្តីវៀតណាម បានប្រាប់ទៅក្រសួងផែនការ និងវិនិយោគ ឱ្យរៀបចំគម្រោងសាងសង់ស្ថានីយគ្រប់គ្រងអវកាស ក្រោយពេលដែលវៀតណាម បានបង្ហោះផ្កាយរណបមួយទៅកាន់ទីអវកាសដោយជោគជ័យកាលពីថ្មីៗនេះ។ ការថ្លែងនេះ ធ្វើឡើងនៅក្នុងកិច្ចប្រជុំមួយស្តីពីការផលិត និងបាញ់បង្ហោះផ្កាយរណប នៅក្រុងហាណូយ កាលពីថ្ងៃទី២១ ខែមករា ឆ្នាំ២០១៩។

លោក ង្វៀន សួនហ្វុក ថ្លែងនាពេលកន្លងមក

លោក ង្វៀន សួនហ៊្វុក បានសន្យាគាំទ្រយ៉ាងពេញទំហឹងចំពោះអ្នកវិទ្យាសាស្រ្ត និងវិស្វករវៀតណាម ក្នុងការអភិវឌ្ឍបច្ចេកវិទ្យាអវកាស។

កាលពីថ្ងៃទី១៨ ខែមករា ឆ្នាំ២០១៩ ផ្កាយរណបវៀតណាមឈ្មោះ «នាគច្រមក់ (Micro Dragon)» ត្រូវបានបង្ហាះតាមរយៈគ្រាប់រ៉ុកកែតរបស់ជប៉ុន ចេញពីមជ្ឈមណ្ឌលអវកាស Uchinoura ខេត្ត Kagoshima ប្រទេសជប៉ុន។ ផ្កាយរណបនេះ នឹងត្រូវប្រើប្រាស់សម្រាប់តាមដានពីស្ថានភាពនៅតាមតំបន់ឆ្នេរ ប្រទេសវៀតណាម ដូចជាគុណភាពទឹកសមុទ្រ ការនេសាទ និងបម្រែបម្រួលផ្សេងៗដើម្បីជួយផ្នែកវារីវប្បកម្ម។

ផ្កាយរណប នាគច្រមក់ ដែលត្រូវបានបាញ់បង្ហោះតាមរយៈរ៉ុកកែតជប៉ុន

ការបាញ់បង្ហោះផ្កាយរណបនេះ ត្រូវបានលោក ង្វៀន សួនហ៊្វុក អះអាងថា ជាការបង្ហាញនូវអធិបតេយ្យអវកាសរបស់វៀតណាម ក្នុងយុគសម័យឌីជីថល និងសមត្ថភាពរបស់ខ្លួនលើការរចនា និងការផលិតផ្កាយរណប។

សូមបញ្ជាក់ថា ផ្កាយរណប «នាគច្រមុះ» ត្រូវបានអភិវឌ្ឍដោយវិស្វករវៀតណាម ៣៦នាក់មកពីមជ្ឈមណ្ឌលអវកាសជាតិ ដោយមានជំនួយពីអ្នកជំនាញជប៉ុនផងដែរ។ វិស្វករទាំងនេះ ត្រូវបានបញ្ជូនទៅសិក្សាផ្នែកបច្ចេកវិទ្យាអវកាសនៅសាកលវិទ្យាល័យធំៗទាំង៥របស់ជប៉ុន ក្នុងចន្លោះឆ្នាំ ២០១៣ និង ២០១៧៕