នៅឆ្នាំ២០១៩ កម្ពុជាអាចនាំចេញចេកអំបូងលឿងប្រមាណជាង ១លានតោន
- 2019-01-22 09:14:24
- ចំនួនមតិ 0 | ចំនួនចែករំលែក 0
នៅឆ្នាំ២០១៩ កម្ពុជាអាចនាំចេញចេកអំបូងលឿងប្រមាណជាង ១លានតោន
ចន្លោះមិនឃើញ
នៅក្នុងឆ្នាំ២០១៩នេះ កម្ពុជាអាចនាំចេញចេកអំបូងលឿង ទៅកាន់ទីផ្សារអន្តរជាតិប្រមាណជាង ១លានតោន។ នេះបើតាមការបញ្ជាក់ពីលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ កាលពីថ្ងៃទី២០ ខែមករា ក្នុងឱកាសចុះពិនិត្យការនាំចេញចេកអំបូងលឿងរបស់ក្រុមហ៊ុនឡុង ស្រេង បឹងកេត នីហរ័ណ អាហរ័ណ។
ការអះអាងរបស់លោករដ្ឋមន្ត្រីដូចនេះ ធ្វើឡើងបន្ទាប់ពីលោកបានសង្កេតឃើញថា ត្រឹមដើមឆ្នាំ២០១៩តែប៉ុណ្ណោះ កម្ពុជាបាននាំចេញចេកអំបូងលឿងបានប្រមាណជាង ៦០០០តោនទៅកាន់ទីផ្សារអន្តរជាតិ។ ម្យ៉ាងទៀត វាមានសក្តានុពលសេដ្ឋកិច្ចខ្លាំង សម្រាប់អ្នកផលិតបម្រើការនាំចេញ ដោយដំណាំចេកអំបូងលឿងក្នុងផ្ទៃដីមួយហិកតាក្នុងមួយឆ្នាំ គឺអាចទទួលបានប្រាក់ចំណូលពី ៥ពាន់ទៅ ១ម៉ឺនដុល្លារអាមេរិក។
ទន្ទឹមនឹងនេះដែរ លោក វេង សាខុន បានបញ្ជាក់បន្ថែមថា ដើម្បីបម្រើឲ្យការនាំចេញ ពីកម្ពុជាបានកាន់តែច្រើននោះក្រសួងកសិកម្មបានជំរុញឲ្យមានកន្លែងដាំចេកអំបូងលឿង សម្រាប់នាំចេញប្រមាណជា ៤ទីតាំងបន្ថែមទៀត។
គួរបញ្ជាក់ដែរថា បើយោងតាមរបាយការណ៍របស់លោកនាយកក្រុមហ៊ុនឡុងស្រេងបឹងកេតនីហរ័ណ អាហរ័ណបានឲ្យដឹងថា ក្រុមហ៊ុនបានដាក់ទុនវិនិយោគលើទឹកប្រាក់ប្រមាណជាង ៨លានដុល្លារ ដាំដុះចេកអំបូងលឿង លើផ្ទៃដីសាកល្បង ៥០០ហិកតា ក្នុងនោះផ្ទៃដី ១០០ហិកតាកំពុងធ្វើការប្រមូលផលនិងវេចខ្ចប់នាំ ចេញទៅកាន់ទីផ្សារចិន ហើយអនាគតគ្រោងពង្រីកផ្ទៃដីដាំដុះឲ្យដល់ ១៥០០ហិកតា ដើម្បីឆ្លើយតបតាមតម្រូវការទីផ្សារប្រទេសចិន៕