រោងចក្រផលិតយន្តហោះចម្បាំងនៅអាមេរិក គ្រោងប្ដូរទីតាំងមកកាន់ប្រទេសមួយនៅអាស៊ី

2019-01-23 07:10:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ដោយសារតម្រូវការទីផ្សារខ្ពស់ លើយន្តហោះចម្បាំងប្រភេទ F-16, ក្រុមហ៊ុនអាមេរិក Lockheed Martin កំពុងសម្លឹងមើលពីលទ្ធភាពក្នុងការសាងសង់រោងចក្រផលិត F-16 មួយកន្លែង នៅក្នុងប្រទេសឥណ្ឌា ដោយផ្លាស់ទីតាំងចេញពីសហរដ្ឋអាមេរិក។ នេះបើយោងតាមការចុះផ្សាយរបស់ Business insider នៅថ្ងៃទី២២ ខែមករា ឆ្នាំ២០១៩។

យន្តហោះចម្បាំងប្រភេទ F-16 (រូប៖ AP)

មន្ត្រីជាន់ខ្ពស់ក្រុមហ៊ុន Lockheed Martin លោក Vivek Lall អនុប្រធានអភិវឌ្ឍន៍យុទ្ធសាស្ត្រ និងជំនួញ បានបង្ហើបថា តម្រូវការទីផ្សារប្រមាណជាង ២០ពាន់លានដុល្លារអាមេរិកលើយន្តហោះ F-16 មាននៅបណ្ដាប្រទេសជុំវិញប្រទេសឥណ្ឌា ដែលជាហេតុនាំឲ្យក្រុមហ៊ុន ចង់សាងសង់រោងចក្រ នៅក្នុងប្រទេសអាស៊ីមួយនេះ។

លោក Lall បន្តថា ប្រទេសបារ៉ែន និងស្លូវ៉ាគី បានជ្រើសរើសយន្តហោះចម្បាំង F-16 ហើយប្រទេសប៊ុលហ្គារី និង ១០ប្រទេសផ្សេងទៀត កំពុងស្ថិតក្នុងការចរចា។ លោកថា តម្រូវការយន្តហោះ F-16 មានជាង ២០០គ្រឿងនៅបណ្ដាប្រទេសនានា ដែលនៅជុំវិញប្រទេសឥណ្ឌា។ មន្ត្រីជាន់ខ្ពស់ដដែលបន្ថែមថា រោងចក្រដែលគ្រោងផ្លាស់ទៅកាន់ឥណ្ឌា គឺរោងចក្រមួយកន្លែងនៅក្រុង Fort Worth រដ្ឋតិចសាស។

Lockheed បានជ្រើសរើសក្រុមហ៊ុន Tata Advanced Systems ដែលមានទីស្នាក់ការនៅឥណ្ឌា ធ្វើជាដៃគូក្នុងគម្រោងរោងចក្រផលិតយន្តហោះ F-16។

រោងចក្រផលិត F-16 នៅអាមេរិក (រូបថត៖ wfaa)

សូមជម្រាបថា យន្តហោះ F-16 របស់ Lockheed Martin កំពុងប្រកួតប្រជែងជាមួយយន្តហោះចម្បាំង Gripen របស់ក្រុមហ៊ុន Saab, យន្តហោះចម្បាំង F/A-18 របស់ប៊ូអ៊ីញ, យន្តហោះចម្បាំង Rafale របស់ Dassault Aviation និងក្រុមហ៊ុនមួយចំនួនទៀត ដើម្បីផ្គត់ផ្គង់សម្រាប់ទ័ពអាកាសឥណ្ឌា ប្រមាណ ១១៤គ្រឿង ក្នុងតម្លៃប៉ាន់ស្មានជាង ១៥ពាន់លានដុល្លារអាមេរិក៕

ប្រភព៖ Businessinsider ប្រែសម្រួល៖ លាភ.