វេណេហ្ស៊ុយអេឡា ទុកពេល ៧២ម៉ោងឲ្យមន្ត្រីទូតអាមេរិក ចាកចេញ

2019-01-24 03:09:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Nicolas Maduro ប្រធានាធិបតីប្រទេសវេណេហ្ស៊ុយអេឡា កាលពីថ្ងៃទី២៣ ខែមករា ឆ្នាំ២០១៩ បានប្រកាសកាត់ផ្ដាច់ទំនាក់ទំនងការទូតជាមួយសហរដ្ឋអាមេរិក និងទុកពេលឲ្យ ៧២ម៉ោង ដើម្បីឲ្យមន្ត្រីទូតអាមេរិកទាំងអស់ រើចេញពីប្រទេសមួយនេះ។

លោក Nicolas Maduro ប្រធានាធិបតីប្រទេសវេណេហ្ស៊ុយអេឡា (រូប៖ Reuters)

លោកប្រធានាធិបតីវេណេហ្ស៊ុយអេឡា បានបញ្ជាឲ្យពិនិត្យឡើងវិញពីទំនាក់ទំនងជាមួយអាមេរិក បន្ទាប់ពីរដ្ឋបាលលោកប្រធានាធិបតី ដូណាល់ ត្រាំ ប្រកាសទទួលស្គាល់មេដឹកនាំគណបក្សប្រឆាំង លោក Juan Guaido ជាប្រធានាធិបតីបណ្ដោះអាសន្នរបស់វេណេហ្ស៊ុយអេឡា។

ក្នុងវីដេអូមួយដែលបានផ្ញើទៅកាន់ប្រជាជនវេណេហ្ស៊ុយអេឡា លោក Mike Pence អនុប្រធានាធិបតីអាមេរិក បានហៅលោក Maduro ថាមេដឹកនាំផ្តាច់ការ មិនស្របច្បាប់។ ជាការឆ្លើយតប លោកប្រធានាធិបតីវេណេហ្ស៊ុយអេឡា បានប្រតិកម្មឆ្លើយតបតាមប៉ុស្តិ៍ស្ថានីយទូរទស្សន៍របស់រដ្ឋមួយ ដោយលោកចាត់ទុកជាពេលវេលាដែលទំនាក់ទំនងប្រទេសទាំងពីរ ធ្លាក់ចុះទាបបំផុត ក្នុងរយៈពេល ២០០ឆ្នាំ។

លោក Mike Pence អនុប្រធានាធិបតីអាមេរិក (រូប៖ politico.com)

ទោះជាយ៉ាងណា លោក Mike Pompeo រដ្ឋមន្ត្រីការបរទេសអាមេរិក បានធ្វើសេចក្ដីថ្លែងការណ៍បដិសេធជំហរនៃការផ្តាច់ទំនាក់ទំនងរវាងប្រទេសទាំងពីរ ដោយសារលោក Manduro មិនមានអំណាចដើម្បីធ្វើដូច្នេះនោះទេ។ លោកថា អាមេរិក ធ្វើទំនាក់ទំនងការទូតជាមួយតែរដ្ឋាភិបាល ដែលដឹកនាំដោយមេបក្សប្រឆាំងលោក Juan Guaido តែប៉ុណ្ណោះ។

អ្នកគាំទ្របក្សប្រឆាំង បានធ្វើការតវ៉ា នឹងរដ្ឋបាលលោក Maduro ជុំវិញបញ្ហាអតិផរណា កង្វះទំនិញប្រើប្រាស់ប្រចាំថ្ងៃ និងវិបត្តិជនអន្តោរប្រវេសន៍ នៅវេណេហ្ស៊ុយអេឡា៕

ប្រភព៖ Foxnews | nytimes ប្រែសម្រួល៖ លាភ.