ប្រទះឃើញកូនផ្សោតទន្លេមេគង្គដែលទើបកើតថ្មីជាលើកដំបូង នៅឆ្នាំនេះ
- 2019-01-30 04:19:24
- ចំនួនមតិ 0 | ចំនួនចែករំលែក 0
ប្រទះឃើញកូនផ្សោតទន្លេមេគង្គដែលទើបកើតថ្មីជាលើកដំបូង នៅឆ្នាំនេះ
ចន្លោះមិនឃើញ
ក្រុមអ្នកចម្លងទូកទេសចរណ៍មើលសត្វផ្សោត កាលពីថ្ងៃទី២៧ ខែមករា ឆ្នាំ២០១៩ បានប្រទះឃើញកូនផ្សោតទើបកើតថ្មីមួយក្បាលក្នុងអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ។ ការណ៍នេះ ត្រូវបានអង្គការមូលនិធិសកលសម្រាប់អភិរក្សធនធានធម្មជាតិ (WWF-Cambodia) ហៅថា ជាការប្រទះឃើញជាលើកដំបូងនៅដើមឆ្នាំ២០១៩។ នេះបើតាមការចុះផ្សាយរបស់អង្គការ WWF-Cambodia នៅព្រឹកថ្ងៃទី៣០ ខែមករា ឆ្នាំ២០១៩។
ក្រោយប្រទះឃើញកូនផ្សោតនេះ ក្រុមអ្នកចម្លងទូកទេសចរណ៍ បានរាយការណ៍ជូនលោក ស្រី ស៊ីថា ជាមន្ត្រីប៉ូលីសទេសចរណ៍ ប្រចាំការនៅរមណីយដ្ឋានអន្លង់ផ្សោតកាំពី បន្ទាប់មកលោក ស្រី ស៊ីថា ក៏បានផ្តល់ព័ត៌មានជូនក្រុមការងាររបស់អង្គការ WWF-កម្ពុជា ប្រចាំខេត្តក្រចេះ។
តាមរយៈការអង្កេតជាក់ស្តែងបានបង្ហាញថា កូនផ្សោតថ្មី ស្ថិតនៅក្នុងក្រុមហ្វូងផ្សោតធំចំនួនប្រមាណជា ៦ក្បាល ហើយវាគឺជាកូនផ្សោតទីមួយហើយដែលបានកត់ត្រាថាបានកើតនៅក្នុងឆ្នាំ ២០១៩ នៅក្នុងខែមករានេះ។
អង្គការ WWF-កម្ពុជា បានលើកឡើងថា កូនផ្សោតទើបកើតថ្មីនេះ បានឆ្លុះបញ្ជាំងពីភាពវិជ្ជមាននៃកិច្ចខិតខំប្រឹងប្រែងរួមគ្នាក្នុងការងារអភិរក្សសត្វផ្សោតទន្លេមេគង្គ រវាងអង្គការ WWF-កម្ពុជា និងដៃគូអភិរក្សដូចជា រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន ក្រសួងទេសចរ ប្រជាសហគមន៍នេសាទ ភ្នាក់ងារទេសចរធម្មជាតិ និងអាជ្ញាធរថ្នាក់ខេត្ត ស្រុកឃុំ និងវិស័យឯកជននានា៕
សូមទស្សនាវីដេអូ៖