ស្ពានឫស្សីកោះប៉ែន ត្រូវបានបញ្ចប់ការជួសជុលហើយ
- 2019-01-30 06:23:49
- ចំនួនមតិ 0 | ចំនួនចែករំលែក 0
ស្ពានឫស្សីកោះប៉ែន ត្រូវបានបញ្ចប់ការជួសជុលហើយ
ចន្លោះមិនឃើញ
ស្ពានប្រដឹសឬស្សីកោះប៉ែន ត្រូវបានបញ្ចប់ដំណើរការជួសជុសហើយ លើប្រវែងបណ្តោយស្ពានដែលរងការបំផ្លាញអស់ប្រមាណជិត៤០០ ម៉ែត្រ ពីការបុកដាច់របស់ចរន្តទឹកជំនន់ទន្លេមេគង្គខុសរដូវកាលនោះ។ ស្ពាននេះ ក៏ត្រូវបានបើកដំណើរការទទួលភ្ញៀវដូចធម្មតាចាប់ពីរសៀលថ្ងៃទី ២៩ ខែមករា ឆ្នាំ២០១៩។
លោក ប៊ុន ដារ៉ា ម្ចាស់ស្ពានឬស្សីដ៏ល្បីឈ្មោះនេះ បានបញ្ជាក់ឲ្យដឹងថា ខាងលោកបានដំណើរការជួសជុលស្ពានរួចរាល់នូវមុនផែនការចំនួន៥ថ្ងៃ។ ដោយសារទឹកទន្លេចាប់ស្រកពីថ្ងៃទី ២៤ មករា ហើយការជួសជុល គឺប្រើប្រាស់កម្មករសរុបប្រហែល ៣០ នាក់ នៅក្នុងសហគមន៍កោះប៉ែន និងប្រមូលទិញឬស្សីសម្រាប់ជួសជុលក្នុងសហគមន៍នេះតែម្តង ពោលគឺមិនចាំបាច់ចំណាយពេលឡើង ទៅទិញដើមឬស្សីនៅខេត្តក្រចេះដូចសព្វដងឡើយ។
លោកបានឲ្យដឹងថា ដោយការជំរុញរបស់អាជ្ញាធរខេត្តកំពង់ចាមធ្វើបែបណាអាចទទួលភ្ញៀវបានឡើងវិញនៅរង្វង់បុណ្យចូលឆ្នាំចិន វៀតណាម គឺខាងលោកបានសម្រុកជួសជុល លើកន្លែងបុកដាច់ខូចខាតពីកម្លាំងចរន្តទឹកទន្លេនេះ ប៉ែកខាងក្រុងកំពង់ចាមចំនួនជាង ១០០ ម៉ែត្ររួចហើយ។ ប៉ុន្តែនៅព្រឹកថ្ងៃទី ២៩ មករា ទើបជួសជុលបង្ហើយ ប៉ែកខាងកោះប៉ែនដែលរងការខូចខាតសរុបប្រវែងជិត ៣០០ម៉ែត្រ។
ម្ចាស់ផ្ទះរូបនេះ បានបន្តថា ចំណែកការងារដែលនៅសេសសល់ដូចជា បង្កាន់ដៃស្ពាន និងបំពាក់អំពូលភ្លើងបំភ្លឺសម្រាប់ពេលយប់តាមបណ្តោយស្ពាននោះ គឺខាងក្រុមការងារធ្វើជាបណ្តើរៗ ហើយភ្ញៀវក៏អាចអញ្ជើញឆ្លងកាត់បានធម្មតា មិនប៉ះពាល់ទេ។ ប៉ុន្តែអ្វីដែលបារម្ភ គឺរបបទឹកទន្លេមេគង្គអាចហក់ជន់ឡើងមិនទៀងទាត់ ពីការបើកទឹកទំនប់វារីអគ្គិសនីពីសំណាក់ប្រទេសជិតខាងប៉ែកខាងលើ នៃទន្លេមេគង្គ និងទន្លេសេសាន ដោយមិនបានជូនដំណឹងជាមុននោះ។
គួររំលឹកថា ស្ពានប្រដឹសឬស្សីកោះប៉ែនដែលមានទំហំទទឹង ២ម៉ែត្រ និងបណ្តោយប្រវែង ៨០០ម៉ែត្រសាងសង់ចេញពីកំពង់ដើមពោធិ មុខវត្តដីដុះ ក្រុងកំពង់ចាម ទៅកាន់ឆ្នេរខ្សាច់កោះប៉ែន និងចំ ណាយថវិកាអស់ជិត បីម៉ឺន ដុល្លារអាមេរិកនោះ គឺទើបតែបើកឲ្យដំណើរការទទួលភ្ញៀវឆ្លងកាត់បានប្រហែលបីសប្តាហ៍ប៉ុណ្ណោះ ក៏ត្រូវចរន្តទឹកជំនន់ខុសរដូវរបស់ទន្លេមេគង្គជន់លិច និងហូរបុកបំផ្លាញអស់រាប់រយម៉ែត្រ៕