ក្រសួងមហាផ្ទៃ សម្រេចចុះឈ្មោះគណបក្សរបស់លោក អ៊ិត សារម្យ

2019-02-08 01:27:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចចុះឈ្មោះ «គណបក្សបំណងពលរដ្ឋ (គបព)» ដែលមានលោក អ៊ិត សារម្យ ជាប្រធាន ក្នុងបញ្ជីគណបក្សនយោបាយ។ នេះបើតាមប្រកាសចុះហត្ថលេខាដោយសម្តេច ស ខេង កាលពីថ្ងៃទី០៧ ខែកុម្ភៈ ឆ្នាំ២០១៩។

ទីស្នាក់ការកណ្តាលគណបក្សនេះ មានទីតាំងស្ថិតនៅផ្ទះលេខ៣៤ ផ្លូវលេខ២០ បុរីពិភពថ្មី ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។

សម្តេច ស ខេង បានបញ្ជាក់ថា គណបក្សបំណងពលរដ្ឋ ត្រូវធ្វើសកម្មភាពស្របតាមច្បាប់ស្តីពីគណបក្សនយោបាយ លិខិតបទដ្ឋានគតិយុត្តនានាជាធរមាន និងលក្ខន្តិកៈរបស់គណបក្សដែលតម្កល់ទុកនៅក្រសួងមហាផ្ទៃ។

គួររំលឹកថា លោក អ៊ិត សារម្យ បានដាក់ពាក្យស្នើសុំបង្កើតគណបក្សបំណងពលរដ្ឋ នៅក្រសួងមហាផ្ទៃ កាលពីថ្ងៃទី៦ ខែកក្កដា ឆ្នាំ២០១៨។

លោក អ៊ិត សារម្យ ដែលធ្លាប់ចូលរួមបង្កើតគណបក្សសម្ព័ន្ធដើម្បីប្រជាធិបតេយ្យ

លោក អ៊ិត សារម្យ បានប្រឡូកនយោបាយ តាំងពីកម្ពុជារៀបចំការបោះឆ្នោតអាណត្តិទីមួយមកម្ល៉េះ។ ដំបូងលោកបានចូលរួម ក្នុងចលនាយុវជន របស់គណបក្សហ៊្វុនស៊ីនប៉ិក និងក្រោយមកបានចូលរួមជីវភាពនយោបាយ ជាមួយគណបក្សជាតិខ្មែរ ដែលបានប្តូរឈ្មោះជា គណបក្សសម រង្ស៊ី។ លោក អ៊ិត សារម្យ បានបន្តប្តូរទ្រនំទៀត ដោយមកចូលរួមបង្កើតគណបក្សសម្ព័ន្ធដើម្បីប្រជាធិបតេយ្យ នៅឆ្នាំ២០០៦។ ប៉ុន្តែ ក្រោយរួមរស់នៅជាមួយគ្នាបាន៦ឆ្នាំ លោកត្រូវបានបណ្តេញចេញពីគណបក្សនេះ នៅឆ្នាំ២០១២ ដោយសារទំនាស់ផ្ទាល់ខ្លួន។

គិតមកដល់ពេលនេះ គណបក្សនយោបាយដែលបានចុះបញ្ជីឈ្មោះនៅក្រសួងមហាផ្ទៃ មានចំនួន ៤២គណបក្ស៕