ក្រោយចុះកុងត្រាជាមួយ Muangthong អ្នកចាំទីវៀតណាម ទទួលបាន ១ម៉ឺនដុល្លារ/១ខែ រួមទាំងផ្ទះ-ឡាន

2019-02-08 08:32:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកចាំទីក្រុមជម្រើសជាតិវៀតណាម Dang Van Lam បានចុះកុងត្រាលេងឱ្យក្លឹបថៃ Muangthong United រយៈពេល៣ឆ្នាំ កាលពីថ្ងៃទី៧ ខែកុម្ភៈ ឆ្នាំ២០១៩។ ក្នុងនោះ រូបគេនឹងទទួលបានប្រាក់ ១ម៉ឺនដុល្លារក្នុង១ខែ រួមទាំងផ្ទះ១ (អាផាតមីន) និងរថយន្ត១គ្រឿង ពីក្លឹបនេះផងដែរ។ នេះបើតាមការចុះផ្សាយរបស់ Vietnam News នៅថ្ងៃទី៨កុម្ភៈនេះ។

Dang Van Lam ពេលមកដល់កម្ពុជា កាលពីព្រឹកថ្ងៃទី៨កុម្ភៈ ២០១៩

កីឡាករកូនកាត់ វៀតណាម-រុស្ស៊ី វ័យ ២៥ឆ្នាំរូបនេះ នឹងពាក់អាវលេខ១ នៃក្លឹប Muangthong សម្រាប់រដូវកាលថ្មីនៃលីគកំពូលថៃ ដែលនឹងចាប់ផ្តើមឆាប់ៗនាពេលខាងមុខនេះ។ Dang Van Lam គឺជាកីឡាករថ្មីទី៥ ដែល Muangthong ចុះកុងត្រាជាមួយ សម្រាប់រដូវកាលថ្មី។ មិនតែប៉ុណ្ណោះ អ្នកចាំទីរូបនេះ ក៏ទើបតែមកដល់កម្ពុជា ជាមួយកីឡាករ Muangthong ផ្សេងទៀត ដើម្បីត្រៀមប្រកួតទល់នឹង Cambodia All-Star ដែលធ្វើឡើងនាថ្ងៃទី៩កុម្ភៈ នៅពហុកីឡដ្ឋានជាតិ។

ចុចអាន៖ ទិដ្ឋភាពកីឡាករក្រុម Muangthong United មកដល់កម្ពុជាព្រឹកនេះ!

Dang Van Lam បានបង្ហាញភាពរីករាយក្នុងការចុះកុងត្រាជាមួយ Muangthong ដោយសារក្រុមនេះ ស្ថិតក្នុងចំណោមក្រុមកំពូលៗនៃប្រទេសថៃ និងជាក្រុមដ៏ជោគជ័យ ដែលបានលេងក្នុងពានធំៗនៅក្នុងតំបន់អាស៊ីផងដែរ។

កីឡាករក្លឹប Muangthong ពេលមកដល់កម្ពុជា កាលពីព្រឹកថ្ងៃទី៨កុម្ភៈ ២០១៩

កីឡាករដែលផ្ទេរមកពីក្លឹបវៀតណាម Hai Phong FC រូបនេះ អះអាងថា តាមរយៈការចូលរួមជាមួយ Muagthong រូបគេនឹងកាន់តែមានសមត្ថភាពកើនឡើងបន្ថែមទៀត ហើយនឹងអាចចូលរួមចំណែកជួយឱ្យក្លឹបឈ្នះជើងឯកទៀតផង៕

ប្រភព៖ Vietnam News ប្រែសម្រួល៖ សំភី